ۇكىمەت اۋىل شارۋاشىلىعى مينيسترلىگى مەن «تۇركىستان ماقتا اگروونەركاسىپتىك كەشەنى» جشس اراسىندا تۇركىستان وبلىسىندا شيتتى ماقتانى وسىرۋ جانە تەرەڭ وڭدەۋ بويىنشا ينۆەستيتسييالار تۋرالى كەلىسىم جاساۋدى ماقۇلدادى, دەپ حابارلايدى Shalqar.kz “قر اۋىل شارۋاشىلىعى مينيسترلىگىنە” سىلتەمە جاساپ. تيىستى قاۋلىعا پرەمьەر-مينيستر ولجاس بەكتەنوۆ قول قويدى.

جوبا مەملەكەت باسشىسىنىڭ اۋىل شارۋاشىلىعى سالاسىن دامىتۋ جانە وزىق اگروتەحنولوگييالاردى ەنگىزۋ بويىنشا قويعان تاپسىرمالارىن جۇزەگە اسىرۋدى كوزدەيدى.

جوبانىڭ ماقساتى – القاپتا ماقتا وسىرۋدەن باستاپ دايىن كيىم وندىرۋگە دەيىن وندىرىستىڭ تولىق تسيكلىن قالىپتاستىرۋ. ناتيجەسىندە وتىرار اۋدانى مەن ارىس قالاسىندا 60 مىڭ گەكتار سۋارمالى جەر الاڭىندا ورتالىق ازيياداعى ىرى ماقتا وسىرۋ كەشەنىن قۇرۋ جوسپارلانۋدا. 1,4 مىڭنان استام تۇراقتى جانە 300-دەن استام ۋاقىتشا جۇمىس ورنى اشىلادى.

ينۆەستور – قىتايلىق Xinjiang Lihua (Group) Co., Ltd. كومپانيياسى. جوبانى جۇزەگە اسىرۋدىڭ بىرىنشى كەزەڭىندە 58 ملرد تەڭگەدەن استام ينۆەستيتسييا كوزدەلگەن, شەتەلدىك ينۆەستيتسييالاردىڭ جالپى كولەمى 200 ملرد تەڭگەدەن اسادى, بۇل تۋرالى بۇرىن پرەمьەر-مينيستر ولجاس بەكتەنوۆ پەن Xinjiang Lihua باسشىسى چجان تسيحايدىڭ كەلىسسوزدەرى بارىسىندا ۋاعدالاستىقتارعا قول جەتكىزىلگەن بولاتىن.

بۇرىن سوڭدى مۇنداي اۋقىمدا قولدانىلماعان تەحنولوگييالىق شەشىمدەردى ەنگىزۋ كوزدەلۋدە: تامشىلاتىپ سۋارۋدىڭ تيىمدىلىگى جوعارى جۇيەسى بار 196 سورعى ستانساسىن, 500 شاقىرىمنان استام سۋارۋ جانە تاراتۋ ارنالارىن, ۇش ىرى سورعى كەشەنىن جانە ۇش ترانسفورماتورلىق قوسالقى ستانسانى, تىڭايتقىشتاردى ينتەگراتسييالانعان ادىسپەن بەرۋ جۇيەسىن, سونداي-اق الەمدىك جەتەكشى وندىرۋشىلەردىڭ زاماناۋي اۋىل شارۋاشىلىعى تەحنيكاسىن – جوعارى قۋاتتى تراكتورلاردى, ماقتا جيناۋ ماشينالارىن, بۇرىككىشتەر جانە مامانداندىرىلعان قۇرىلىس تەحنيكاسىن پايدالانۋ.

سونىمەن قاتار كەشەن اۋماعىندا پوليەتيلەندى قايتا وڭدەۋ جانە تامشىلاتىپ سۋارۋعا ارنالعان قۇرال مەن يىلگىش قۇبىرلاردى شىعارۋ بويىنشا جەلى قۇرىلادى, بۇل يمپورتقا تاۋەلدىلىكتى ازايتۋعا جانە ماقتا وسىرۋدەن باستاپ يىرىلگەن جىپ, ماتالار مەن كيىمدەردى شىعارۋعا دەيىنگى تۇيىق وندىرىستىك تسيكلدى قالىپتاستىرۋعا مۇمكىندىك بەرەدى. بۇگىندە قازاقستاندا جىل سايىن 70-75 مىڭ توننا ماقتا تالشىعى وندىرىلەدى, ونىڭ 85%-ى ەكسپورتتالادى.

جوبانى جۇزەگە اسىرۋ ەل ىشىندە تەرەڭ قايتا وڭدەۋ ۇلەسىن ۇلعايتۋعا, قوسىلعان قۇنى جوعارى دايىن توقىما ونىمدەرىن شىعارۋدى كەڭەيتۋگە مۇمكىندىك بەرەدى, بۇل تۇتاستاي العاندا وتاندىق توقىما ونەركاسىبىنىڭ وندىرىستىك بازاسىن نىعايتادى, ەكسپورتتىق الەۋەتتى ارتتىرادى, سونداي-اق شاعىن جانە ورتا بيزنەستى – لوگيستيكانى, تەحنيكانى جوندەۋدى جانە اۋىل شارۋاشىلىعى ونىمدەرىن قايتا وڭدەۋدى دامىتۋ ۇشىن درايۆەر بولادى.