قورعانىس مينيسترلىگى 2025 جىلعى 4 جەلتوقساندا قازاقستاندا تارتىپتىڭ مازمۇنىن ايتارلىقتاي وزگەرتەتىن جانە قارۋلى كۇشتەردىڭ وقۋشىلاردى قىزمەتكە دايارلاۋعا قاتىسۋىن نىعايتاتىن العاشقى اسكەري دايىندىقتىڭ جاڭارتىلعان قاعيدالارى بەكىتىلگەنىن ەسكە سالدى, دەپ حابارلايدى Shalqar.kz.

قورعانىس مينيسترى بۇيرىققا 4 قاراشادا قول قويدى.

"قۇجاتتى باس شتابتىڭ ۇيىمداستىرۋ-جۇمىلدىرۋ جۇمىسى دەپارتامەنتى اسكەري قىزمەت جانە اسكەري-پاتريوتتىق تاربيە تۋرالى زاڭناماعا ەنگىزىلگەن تۇزەتۋلەردى ەسكەرە وتىرىپ ازىرلەدى. ەرەجەلەر مەكتەپتەردە, كوللەدجدەردە جانە كاسىپتىك بىلىم بەرۋ مەكەمەلەرىندە العاشقى اسكەري دايىندىقتى ۇيىمداستىرۋ مەن وقىتۋدىڭ بىرىڭعاي تاسىلدەرىن بەلگىلەيدى, پەداگوگتەرگە قويىلاتىن تالاپتاردى ناقتىلاپ, كۋرستىڭ پراكتيكالىق قۇرامداس بولىگىن كەڭەيتەدى",- دەلىنگەن اقپاراتتا.

نەگىزگى وزگەرىستەردىڭ بىرى "العاشقى اسكەري دايىندىق" تاريحي اتاۋىنىڭ پانگە قايتا ورالۋى بولدى. باعدارلاما اسكەري قىزمەتشىلەردىڭ قۇقىقتارى, مىندەتتەرى مەن الەۋمەتتىك كەپىلدىكتەرى تۋرالى پراكتيكالىق ەلەمەنتتەردى, وقۋ-دالالىق ساباقتاردى كوبەيتۋ جانە تۇسىندىرۋ جۇمىستارىن كەڭەيتۋ ەسەبىنەن كۇشەيتىلەدى.

قازاقستان رەسپۋبليكاسى قورعانىس مينيسترىنىڭ كەڭەسشىسى ايگۇل تولەمباەۆا جاڭارتۋلار بولاشاق اسكەرگە شاقىرىلۋشىلاردى دايارلاۋ ساپاسىن ارتتىرۋعا باعىتتالعانىن اتاپ وتتى.

"بىز پاندى ونىڭ ناقتى مازمۇنىنا ساي ەتەمىز. بۇل ازاماتتاردى ارميياعا دايىنداۋدىڭ بىرىنشى كەزەڭى. بالالار اسكەري قىزمەتشىنىڭ جارعىسىن, مىندەتتەرىن, قىزمەتتەن كەيىنگى قۇقىقتارى مەن كەپىلدىكتەرىن تۇسىنۋى كەرەك. بۇگىنگى اسكەر – بۇل ناقتى ماماندىق پەن بىلىم الۋدىڭ مۇمكىندىگى. مەكتەپ وقۋشىلارىنىڭ بۇل جايلى الدىن الا بىلگەنىن قالايمىز", – دەدى ول.

وقىتۋشىلارعا قويىلاتىن تالاپتار ايتارلىقتاي وزگەرەدى. ااد-نى ماماندىعى بويىنشا پەداگوگيكالىق بىلىمى جانە اسكەري قىزمەت وتكەرۋ تاجىريبەسى بار ازاماتتار عانا جۇرگىزە الادى. پان بويىنشا جۇمىس ىستەيتىن مۇعالىمدەر وز لاۋازىمدارىن ساقتايدى. كەمىندە ون جىل ەڭبەك سىڭىرگەن اسكەري قىزمەتشىلەر ۇشىن قورعانىس مينيسترلىگىنىڭ اسكەري وقۋ ورىندارىنىڭ بازاسىندا تەگىن پەداگوگيكالىق قايتا دايارلاۋ مۇمكىندىگى ەنگىزىلەدى.

بۇل شەشىمنىڭ كادرلىق بازانى نىعايتىپ, وقۋشىلاردىڭ پانگە دەگەن سەنىمىن ارتتىراتىنىن ايتاقان مينيستردىڭ كەڭەسشىسى:

"وقۋشىلار اسكەردە قىزمەت ەتكەن ادامدى كورۋى كەرەك. بۇل قورقىنىش پەن سەنىمسىزدىكتى بولدىرمايدى, ارى ارمييانىڭ قالاي جۇمىس ىستەيتىنىن تۇسىندىرۋگە مۇمكىندىك بەرەدى", – دەدى.

جاڭارتىلعان ەرەجەلەر اسكەري بولىمدەردىڭ رولىن كەڭەيتەدى: وقۋ-دالالىق جيىنداردىڭ پراكتيكالىق قۇرامداس بولىگى كۇشەيتىلەدى, بولىمشە كومانديرلەرى جەكەلەگەن ساباقتارعا قاتىسىپ, دالالىق بازانى كورسەتەدى. ااد وقىتۋشىلارىنىڭ بىلىكتىلىگىن ارتتىرۋ بۇدان بىلاي اسكەري جوعارى وقۋ ورىندارىنىڭ, كافەدرالاردىڭ جانە قورعانىس مينيسترلىگىنىڭ ۆەدومستۆولىق باعىنىستى ۇيىمدارىنىڭ بازاسىندا عانا جۇرگىزىلەدى. بۇل وزەكتى اسكەري تاجىريبەگە قول جەتكىزۋگە ىقپال ەتەدى.