بيىل 19,2 ملن شارشى مەتر تۇرعىن ۇي پايدالانۋعا بەرىلەدى. بۇل تۋرالى ماجىلىس جانىنداعى قوعامدىق پالاتا وتىرىسىندا ونەركاسىپ جانە قۇرىلىس ۆيتسە-مينيسترى قۋاندىق قاجكەنوۆ مالىم ەتتى, دەپ حابارلايدى Shalqar.kz.

- جاڭا تۇرعىن ۇي قۇرىلىسى مەملەكەتتىك ساياساتتىڭ ماڭىزدى باعىتى سانالادى. 2023 جىلدان باستاپ 2024 جىلدى قوسا ەسەپتەگەندە جوسپارلانعان 30,8 ملن شارشى مەتردىڭ ورنىنا 36,9 ملن شارشى مەتر تۇرعىن ۇي پايدالانۋعا بەرىلدى (2023 جىلى 17,8 ملن شارشى مەتر جانە 2024 جىلى 19,1 ملن شارشى مەتر). وسى ورايدا ەكى جىلدىق كەزەڭدە (2023-2024 جىلدار) قابىلدانعان شارالار پرەزيدەنتتىڭ سايلاۋالدى باعدارلاماسىنىڭ جوسپارىنان 6,1 ملن شارشى مەترگە ارتىق ورىنداۋعا مۇمكىندىك بەردى, - دەدى ق. قاجكەنوۆ. 

ونىڭ ايتۋىنشا, بيىل ەل بويىنشا 19,2 ملن شارشى مەتر تۇرعىن ۇيدى پايدالانۋعا بەرۋ جوسپارلانعان. وسى جىلدىڭ 10 ايىندا 14,6 ملن شارشى مەتر تاپسىرىلدى. بۇل 2024 جىلدىڭ سايكەس كەزەڭىمەن سالىستىرعاندا 4,5 پايىزعا ارتىق.

- بۇگىندە پرەزيدەنتتىڭ سايلاۋالدى باعدارلاماسىن ىسكە اسىرۋ جوسپارىنىڭ ورىندالۋى (111 ميلليون شارشى مەتر تۇرعىن ۇي كولەمىندە) 46,4% نەمەسە 51,5 ملن شارشى مەتردى قۇرادى, - دەدى ۆيتسە-مينيستر.

اتاپ ايتقاندا, سايلاۋالدى باعدارلاماسىندا جەتى جىلدا 111 ملن شارشى مەتر باسپانا سالۋ ەسكەرىلگەن. بۇل تۇرعىدا جىل سايىن كەم دەگەندە ورتا ەسەپپەن 15-16 ملن شارشى مەتر پايدالانۋعا بەرىلۋى تيىس. 

بۇدان بۇرىن حابارلانعانداي, مەملەكەت تۇرعىن ۇي كومەگىن بەرۋ ەرەجەلەرىن جاڭارتتى.