قاسىم-جومارت توقاەۆ ەل پرەزيدەنتى رەتىندە كاسىپكەرلەرگە شىنايى قۇرمەتپەن قارايتىنىن ايتتى, - دەپ حابارلايدى Shalqar.kz اقورداعا سىلتەمە جاساپ.

"قازىر الەمدە بولىپ جاتقان ۇدەرىستەردى بارىڭىز دە كورىپ-بىلىپ وتىرسىزدار. گەوەكونوميكالىق احۋال وتە قۇبىلمالى ارى بۇلىڭعىر. وسىنداي كەزەڭدە بيزنەس وكىلدەرىنىڭ جاسامپازدىق, وتانشىلدىق قاسيەتتەرى ايقىن كورىنەدى. مۇنداي ۋاقىتتا كاسىپكەرلەرىمىزدىڭ تاباندى ەڭبەگى جانە ەل بولاشاعىنا دەگەن زور سەنىمى اسا ماڭىزدى ەكەنى انىق.

تۇپتەپ كەلگەندە, ساپالى ونىم شىعارىپ, ساپالى قىزمەت كورسەتۋ – باسەكەگە قابىلەتتى بولۋ جانە ەڭ باستىسى, ەلىمىزدىڭ وركەندەۋىنە ناقتى ىسپەن ۇلەس قوسۋ دەگەن سوز", - دەدى پرەزيدەنت.

ەل پرەزيدەنتى رەتىندە كاسىپكەرلەرگە, ۇلتتىق بۋرجۋازييامىزعا, سونىڭ ىشىندە, ەڭ الدىمەن, وسى زالدا وتىرعان بيزنەس قوعامداستىقتىڭ وكىلدەرىنە شىنايى قۇرمەتپەن قارايمىن. سىزدەردىڭ قابىلەتتەرىڭىزگە, ىسكەرلىك جانە ادامگەرشىلىك قاسيەتتەرىڭىزگە سەنەمىن, دەدى پرەزيدەنت.

"سىزدەر مەملەكەتىمىزدىڭ يگىلىگى, ەكونوميكالىق الەۋەتى ۇشىن تاباندى ەڭبەك ەتىپ كەلە جاتقان قازاقستاننىڭ ناعىز پاتريوتىسىزدار. سىزدەر جەتىستىككە جەتۋدەن شابىت الاتىن, وزگەلەرگە ۇلگى بولاتىن ازاماتسىزدار. ار قادامدارىڭىز ساتتى بولاتىنىنا سەنىمدىمىن.

قانداي دا بىر ىستە بولسىن, پەسسيميزمگە بوي الدىراتىن, ارەكەتسىز, قۇلىقسىز, ىشى تار ادامداردىڭ جەتىستىككە جەتپەيتىنى ەرتەدەن بەلگىلى. مۇنى, اسىرەسە, الەۋمەتتىك جەلىدە ۋاقىتىن وتكىزىپ جاتقان جاستار بىلۋى ارى ەستە ساقتاۋى كەرەك.

شىعىس دانالىعى ەڭ قيىن جاعدايدىڭ وزىندە ۇلكەن مۇمكىندىكتەر جاسىرىنىپ جاتاتىنىن ايتادى. سوندىقتان ەڭسەنى تۇسىرىپ, كۇيزەلىسكە بەرىلۋدىڭ قاجەتى جوق. كەرىسىنشە جەتىستىككە جەتەتىن جول ىزدەۋ كەرەك".