قازاقستاننىڭ ارمەنيياداعى ەلشىلىگى حالىقارالىق ارمەنييا ايەلدەرى قاۋىمداستىعى (IWAY) ۇيىمداستىرعان ەرەۆانداعى جىل سايىنعى داستۇرلى روجدەستۆولىق قايىرىمدىلىق جارمەڭكەسىنە قاتىستى, دەپ حابارلايدى Shalqar.kz.

ىس-شارا داستۇرلى تۇردە ديپلوماتييالىق ميسسييالاردى, حالىقارالىق ۇيىمداردى جانە جەرگىلىكتى قايىرىمدىلىق باستامالاردى بىرىكتىرەدى. جارمەڭكەنىڭ باستى ماقساتى – ارمەنييادا جۇزەگە اسىرىلىپ جاتقان الەۋمەتتىك جانە گۋمانيتارلىق جوبالاردى قولداۋعا قاراجات جيناۋ.

قازاقستاندىق ستەندتە ۇلتتىق بولمىستى ايشىقتايتىن ەستەلىك بۇيىمدار توپتاماسى, سونداي-اق مادەنيەت پەن تۇرمىسقا قاتىستى زاتتار ۇسىنىلدى. قوناقتار ەتنيكالىق ساندىك بۇيىمدار مەن قولونەر تۋىندىلارىنا ەرەكشە قىزىعۋشىلىق تانىتتى.

كورمە قوناقتارىنا قازاق داستارحانى ەرەكشە ۇنادى. ديپميسسييا قىزمەتكەرلەرىنىڭ جۇبايلارى ازىرلەگەن مانتى, پالاۋ, باۋىرساق, سامسا جانە داستۇرلى تاتتىلەر جارمەڭكەدەگى ەڭ سۇرانىسقا يە تاعامداردىڭ قاتارىنا كىردى. سونداي-اق قازى-قارتا دا جوعارى باعالانىپ, كوپتەگەن قوناق ونى قازاقستاننىڭ ۇلتتىق دامىمەن تانىسۋ نيەتىمەن ساتىپ الدى.

ديپلوماتييالىق وكىلدىك وكىلدەرىنىڭ ايتۋىنشا, قازاقستاندىق تاراپتىڭ قاتىسۋى قازاقستان مەن ارمەنييا اراسىنداعى مادەني بايلانىستى نىعايتۋعا جانە گۋمانيتارلىق ىنتىماقتاستىقتى دامىتۋعا ىقپال ەتەدى.

— قازاقستاننىڭ ارمەنيياداعى ەلشىلىگى بۇل قايىرىمدىلىق جارمەڭكەگە جىل سايىن قاتىسادى. قاتىسۋشىلارىمىز داستۇرلى ۇلتتىق تاعامداردى دايىنداپ, ەستەلىك بۇيىمدار ۇسىنىپ, قوناقتاردى ەلىمىزدىڭ مادەنيەتى مەن سالت-داستۇرىمەن تانىستىرادى. بىز اردايىم جەرگىلىكتى تۇرعىنداردىڭ قازاقستانعا جانە ونىڭ اسحاناسىنا دەگەن زور قىزىعۋشىلىعىن سەزىنەمىز. بۇل يگى داستۇر مادەنيەتتەردى جاقىنداستىرىپ, دوستىق اتموسفەراسىن قالىپتاستىرادى ارى ەلىمىزدى بەيرەسمي جاعدايدا جاڭا قىرىنان تانىتۋعا مۇمكىندىك بەرەدى, — دەپ اسەرىمەن بولىستى جارمەڭكەگە قاتىسۋشى لاززات ەركىنوۆا.

ايتا كەتەيىك, وسىعان ۇقساس داستۇرلى قايىرىمدىلىق جارمەڭكە قازاقستان رەسپۋبليكاسىندا اككرەديتتەلگەن ديپلوماتييالىق وكىلدىكتەردىڭ قاتىسۋىمەن تاجىكستاننىڭ ۇلتتىق مۋزەيىندە دە وتكەن بولاتىن.