Qıtaydağı Qazaqstan Mädeniet ortalığında, Qazaqstan Respublikasınıñ Qıtay Halıq Respublikasındağı elşiliginiñ qoldauımen, 6 jeltoqsanda şeteldikter arasında qazaq tilin biluge arnalğan üşinşi jıl sayınğı halıqaralıq konkurs ötti, dep habarlaydı Shalqar.kz.

Bayqauğa Pekin til jäne mädeniet universitetiniñ, Dalyan' şet tilder universitetiniñ studentteri, sonday-aq Qıtay azamattarı arasındağı qazaq tilin üyrenip jürgender qatıstı.

Qatısuşılar Qıtay, Oñtüstik Koreya, Resey, Tailand jäne Japoniya elderinen kelgen. Qonaqtar qatarında ğılımi jäne bilim beru mekemeleriniñ ökilderi, diplomattar jäne qazaqstandıq studentter boldı.

İs-şaranıñ basında qatısuşılardı Qazaqstan Respublikasınıñ Qıtaydağı elşiliginiñ keñesşisi Asqar Şalqarbaev qwttıqtap, söz söyledi. Qıtay tarapınan Pekin şet tilder universitetindegi Qazaqstandı zertteu ortalığınıñ basşısı Sun Fan' jäne Dalyan' şet tilder universitetiniñ oqıtuşısı Lou Yihua söz söyledi.

Spikerler Qazaqstannıñ memlekettik tilin üyrenuge degen qızığuşılıqtıñ artıp kele jatqanın jäne mädenietaralıq özara is-qimıldı nığaytu üşin osınday bastamalardıñ mañızdılığın atap ötti.

Bayqau bağdarlamasına qatısuşılarmen tanısu, swraqtarğa jauaptar, ziyatkerlik tapsırmalar jäne şığarmaşılıq qoyılımdar kirdi. Bayqauğa qatısqandar qazaqtıñ belgili aqındarınıñ öleñderin mänerlep oqıp, memlekettik Änwrandı jäne Qazaqstannıñ tanımal änderin orındadı, mul'tfil'mderdi dıbıstap kördi.

Wyımdastıruşılar barlıq qatısuşınıñ qazaq tilin jäne mädenietin tereñ meñgergenin jäne şınayı qızığuşılıq tanıtqanın atap ötti. Bayqau nätijesi boyınşa birinşi jäne ekinşi orın Dalyan' şet tilder universitetiniñ studentteri Guan' Haonan men Ju Sıi enşiledi. Üşinşi qwrmetti orın bes adam arasında bölindi. Jeñimpazdar men barlıq qatısuşı gramotalarmen jäne estelik sıylıqtarmen marapattaldı.

Pekin şet tilder universitetiniñ qazaq tiliniñ oqıtuşısı Şolpan attı qatısuşı Almatıda segiz jıl boyı qazaq tilin oqığanın aytıp berdi. Onıñ aytuınşa, qatısuşılardıñ qazaq tilin bilu deñgeyi öte joğarı bolğan.

— Meni äsirese qatısuşılardıñ ärtürliligi men jas erekşelikteri tañğaldırdı. Bwrın bayqauğa negizinen qıtaylıq studentter qatısatın, al bügin biz ärtürli elder ökilderin köremiz, eñ ülken qatısuşınıñ jası 62-de, — dedi ol.

62 jastağı bayqauşı Lyu Syaolan' eşkimniñ kömeginsiz özi dayındalıp, memlekettik Änwrandı äserli orındauımen erekşe közge tüsti.

— Men himikpin, ötken jılı zeynetkerlikke şıqtım. Qazaq tilin 2020 jılı Dimaş Qwdaybergenniñ änderin alğaş estigende üyrenuge kiristim. Sol kezde oqu qwraldarın satıp aldım, sodan sabaqqa kiristim, sebebi mağan bwl til şınımen wnadı, — dedi ol.

— Tilge degen süyispenşilik meniñ eñ küşti motivaciyam boldı. Kün sayın qazaq tilinde oquğa tırısatınmın, bastapqıda azdap qana este saqtay alatınmın. Biraq men tabandı boldım, ärbir äripti qayta-qayta qaytalap ayta berdim. Keyin Dimaştıñ barlıq änin orındadım. Men sizderdiñ tiliñizdi şınımen erekşe dep sanaymın, sondıqtan onı şınayı qızığuşılıqpen jäne izdenispen üyrenemin, — dedi ol.

Ayta keteyik, birinşi konkurs 2023 jılı Pekinde, ekinşi 2024 jılı Sianda ötken bolatın. Biıl şara qaytadan QHR astanasına oraldı.