Ұлытау облысында орын алған шахта апаты елді алаңдатты. 17 ақпан күні Жаңаарқа ауданындағы «Қазақмыс» корпорациясына тиесілі «Жомарт» кенішінде кен қабаты опырылып, жеті кенші үйінді астында қалды, деп хабарлайды Shalqar.kz.

Қазіргі уақытта жұмысшылармен байланыс үзілген, себебі кабель желілері үзіліп кеткен. Құтқарушылардың мәліметінше, үйінді астындағы кеншілерге дейінгі қашықтық 1500 метр. Бүгінде олар 800 метр қашықтықты еңсерді. Алайда өткелдегі қалың шаң мен күрделі жағдай құтқару жұмыстарына айтарлықтай кедергі келтіруде.

Жер астындағы кеншілердің тағдыры әзірге белгісіз. Құтқару операциясы күшейтілген режимде жалғасуда.