ەلدە ۆەتەرينارلاردى 11 جوعارى وقۋ ورنى دايارلاپ جاتىر. بۇل تۋرالى اۋىل شارۋاشىلىعى ۆيتسە-مينيسترى امانعالي بەردالين مالىم ەتتى, دەپ حابارلايدى Shalqar.kz.

— بۇگىندە «ۆەتەرينارييا» باعىتى بويىنشا كادرلار دايارلاۋدى 11 جوعارى وقۋ ورنى جۇزەگە اسىرادى, ونىڭ ىشىندە ۇشەۋى اۋىل شارۋاشىلىعى مينيسترلىگىنىڭ جۇيەسىندە. ولار 2025 جىلعا بولىنگەن 1001 (77,5%) گرانت الدى. بۇل رەتتە, وتۋ بالى جالپى كونكۋرس بويىنشا — 62 بالدى, اۋىلدىق كۆوتا بويىنشا 56 بالدى قۇرادى, — دەدى ا. بەردالين سەناتتا ۆەتەرينارييالىق قىزمەت تاقىرىبىن تالقىلاۋعا ارنالعان ۇكىمەت ساعاتىندا.

اۋىل شارۋاشىلىعى مەن عىلىم جانە جوعارى بىلىم مينيسترلىكتەرى مىناداي مىندەتتەردى شەشۋ بويىنشا جۇمىس توبىن قۇردى:

— «ۆەتەرينارييا» باعىتى بويىنشا ستۋدەنتتەرگە ستيپەندييانى پەداگوگيكالىق باعىتتاعى ستۋدەنتتەر دەڭگەيىنە دەيىن ۇلعايتۋ جانە ۆەتەرينارييا ماماندارىن دايارلايتىن جوعارى وقۋ ورىندارىنا تۇسۋ ۇشىن ۇلتتىق بىرىڭعاي تەستىلەۋ بالدارىنىڭ شەگىن بىرتىندەپ كوبەيتۋ;

— اۋىلدىق كۆوتانى 30%-دان 70% (-) عا دەيىن ارتتىرۋ;

— اۋىل شارۋاشىلىعى تاۋارىن وندىرۋشىلەر جىبەرەتىن نىسانالى گرانتتاردىڭ ۇلەسىن ۇلعايتۋ;

— مەملەكەتتىك تاپسىرىستى ورنالاستىرۋدى تيىستى ماتەريالدىق بازاسى, زاماناۋي جابدىقتارى جانە عىلىمي-پەداگوگيكالىق كادرلارى بار جوعارى وقۋ ورىندارىندا عانا جۇزەگە اسىرۋ;

— بىر جىل وقۋ مەرزىمىمەن 3 جىل ىشىندە مەملەكەتتىك تاپسىرىس نەگىزىندە بەيىندى ماگيستراتۋرا ارقىلى ۆەتەرينارييالىق كادرلاردى قايتا دايارلاۋدى ەسكەرۋ.

— مۇنىڭ بارى قازىرگى زاماناۋي ۆەتەرينارييالىق زەرتحانالىق جابدىقتاردا جۇمىس ىستەۋگە, ۆەتەرينارييالىق قاۋىپسىزدىك پروتسەستەرىن تالداۋعا جانە وز بەيىنى بويىنشا ماماندانۋعا قابىلەتتى بىلىكتى كادرلاردى دايارلاۋ قاجەتتىلىگىنەن تۋىندادى, سونداي-اق باسەكەگە قابىلەتتى جاستاردى تارتۋعا مۇمكىندىك بەرەدى. سونىمەن قاتار, مەملەكەت باسشىسىنىڭ تاپسىرماسىنا سايكەس, رەسپۋبليكالىق بيۋدجەت كوميسسيياسى ۆەتەرينارييا ماماندارىنىڭ جالاقىسىن كوتەرۋ ۇشىن 22 ملرد تەڭگە كولەمىندە قارجىلاندىرۋدى قولدادى, — دەدى ۆيتسە-مينيستر.

ەسكە سالساق, كۇزدەن باستاپ پەداگوگيكالىق ماماندىقتا وقيتىن ستۋدەنتتەردىڭ ستيپەنديياسى 84 مىڭ تەڭگە بولدى.