Биыл қазақ әдебиетінің дара тұлғасы, көрнекті жазушы Ілияс Есенберлиннің туғанына 110 жыл толып отыр. Ол қазақ хандығының алғашқы күндерінен бастап, соңғы ханына дейінгі тарихты көркем әдебиет арқылы өшпес мұраға айналдырды, деп хабарлайды Shalqar.kz.

Алматыдағы Ұлттық кітапхана мерейтой аясында арнайы көрме ұйымдастырып, оқырмандарды жазушының бай мұрасымен таныстыруда. Қазақ тарихының қасіреті мен ұлылығын шебер өрнектеген қаламгердің шығармалары – ұлт руханияты үшін баға жетпес қазына.

Жазушының есімі аталғанда, ең алдымен оның “Көшпенділер” және “Алтын Орда” тарихи трилогиялары ойға оралады. Бұл туындылар қазақ халқының қилы тағдырын көркем тілмен өріп, ұрпаққа аманат еткен шығармалар. Сондай-ақ оның “Қауіпті өткел”, “Ғашықтар” романдары да әдебиетсүйер қауымның сүйікті туындыларының қатарында.

Ұлттық кітапхана өкілдерінің айтуынша, көрме үш бөлімнен тұрады:
 1. Бірінші бөлім – Ілияс Есенберлиннің өмір жолына арналған.
 2. Екінші бөлім – жазушының жиырмадан астам романы топтастырылған.
 3. Үшінші бөлім – ғалымдар мен әдебиеттанушылардың жазушы туралы зерттеу еңбектері енгізілген.

ҚР Ұлттық кітапханасының қызметкері Қанат Алтынбек:
“Ілияс Есенберлин 1915 жылы Атбасарда дүниеге келген. Ол қазақ әдебиетінің тарихи жанрын жаңа деңгейге көтерген бірегей тұлға. Оның шығармашылығы – қазақтың ұлы өткені мен ұлттық рухының көрінісі”, – дейді.

Балалық шағы жетімдікпен өткен жазушы Екінші дүниежүзілік соғыста ауыр жараланып, майданнан кейін өзін толықтай әдебиетке арнады. Кеңес үкіметінің цензурасына қарамастан, қазақ хандығының шежіресін бейнелейтін “Көшпенділер” трилогиясын жазып шықты. Бұл еңбегі арқылы ол ұлт тарихын жаңа биікке көтерді.

Ілияс Есенберлин 17 роман жазған, сондай-ақ “Айша” және “Сұлтан” поэмалары арқылы да әдебиет әлемінде өз орнын қалыптастырды. Филология ғылымдарының докторы Нұрдәулет Ақыштың айтуынша:
“Жазушының шығармалары жан-жақты зерттеліп келеді. Дегенмен оның қолжазбалары мен мұрағаттық материалдары әлі де терең зерделеуді қажет етеді”.

Ілияс Есенберлиннің әдеби мұрасы – қазақ халқының өткені мен бүгініне қойылған алтын көпір. Оның шығармалары тек тарихи шындықты ғана емес, ұлттық рухты, еркіндік пен тәуелсіздікке деген ұмтылысты айшықтайды.