Украина үкіметі Америка Құрама Штаттарымен маңызды келісімге қол қоюға дайын екенін мәлімдеді. Бұл келісім Украинадағы минералды ресурстарға, соның ішінде сирек жер металдарына инвестиция тартуды көздейді. Премьер-министр Денис Шмыгаль бұл туралы Telegram арқылы хабарлады, деп хабарлайды Shalqar.kz.

Шмыгальдің айтуынша, келісім аясында Украина мен АҚШ Қалпына келтіру инвестициялық қорын құрады. Бұл қор екі елдің ортақ меншігі болып, үкіметтер тарапынан бірлесіп басқарылады.

“Украинаның жер қойнауы мен ресурстары елдің өз меншігінде қалады, олар АҚШ-қа немесе кез келген басқа мемлекетке берілмейді,” – деп атап өтті Шмыгаль.

Келісімге сәйкес, Украина табиғи ресурстардан түсетін кірістің 50%-ын қорға аударады. Ал АҚШ Украинаны қалпына келтіруге қажетті қаржы құралдарын, инвестициялар мен активтерді ұсынады. Қордағы қаражат тек Украинаның инфрақұрылымы мен экономикасын қалпына келтіру жобаларына жұмсалмақ.

Сонымен қатар, Шмыгаль келісімнің Украина үшін еуропалық интеграция жолындағы маңызды қадамдардың бірі екенін атап өтті.

Бұған дейін АҚШ президенті Дональд Трамп украиналық әріптесі Владимир Зеленскийдің 28 ақпанда Ақ үйге барып, сирек жер металдары бойынша келісімге қол қоюы мүмкін екенін мәлімдеген болатын.