5 сәуірде Астанада өтетін ауқымды бокс кешінде қазақстандық WBO және IBF чемпионы Жәнібек Әлімханұлы шаршы алаңға шығады. Алайда бұл кештің басты қызығы тек оның жекпе-жегі емес. Оқырман назарын өзіне аударатын тағы бір жайт – ұлттық құрама сапында өнер көрсетіп жүрген ағайынды Махмұд және Төрехан Сабырхандардың кәсіпқой боксқа қадам басуы, деп хабарлайды Shalqar.kz.

Қарсыластары әлі анықталмағанымен, бұл бокс кеші қазақстандық жанкүйерлер үшін нағыз тартысқа толы болмақ. Сонымен қатар, осы күні Сұлтан Зауырбек пен Батыр Жүкембаев та жұдырық түйістіреді. Бұдан бөлек, екі дүркін Олимпиада чемпионы, өзбекстандық Баходир Жалолов та кәсіпқой бокстағы шеберлігін көрсетеді.

Айта кетейік, кештің басты оқиғасы – Жәнібек Әлімханұлы мен француздық Анауэль Нгамиссенің жекпе-жегі. Қазақстандық чемпион бұл кездесуде екі белдігін бірдей қорғауды мақсат етіп отыр.