Құрманғазы атындағы Қазақ ұлттық консерваториясында Гнесиндер атындағы Ресей музыка академиясының шығармашылық мектебі өз жұмысын бастады, деп хабарлайды Shalqar.kz тілшісі Сыртқы Істер министрлігіне сілтеме жасап.

Мәскеуден арнайы келген музыка өнерінің майталмандары студенттер мен оқытушыларға ғана емес, өнерсүйер қауымға да шеберлік сыныптарын өткізіп, қызықты дәрістер ұсынуда. Делегация құрамында музыка ғылымы мен орындаушылық өнердің танымал шеберлері бар.

Білім беру бағдарламалары «Музыкатану және композиция», «Арт-менеджмент», «Арнайы фортепиано», «Вокалдық өнер» және «Дирижерлеу» бағыттарын қамтиды.

Шығармашылық мектеп 28 ақпанға дейін жалғасады. Оның қорытындысы ретінде Еркеғали Рахмадиев атындағы үлкен залда өтетін әсерлі концерт ұсынылады. Концертке консерваторияның аралас студенттік хоры қатысады.