الماتى وبلىستىق №1 بالالار ۇيىنىڭ تاربيەلەنۋشىلەرى مەكەمەنىڭ الماتىدان قوناەۆقا كوشىرىلەتىنىنە قارسى شىعىپ, الەۋمەتتىك جەلىدە بەينەۇندەۋ جاسادى. ولار اعاشتاردىڭ كەسىلىپ, اۋماقتىڭ بۇزىلىپ جاتقانىن ايتىپ, كومەك سۇرادى, دەپ حابارلايدى Shalqar.kz.

“بىزدى قالاداعى ۇيىمىزدەن الىسقا, تۇرمەسى بار قوناەۆقا جىبەرگىسى كەلەدى. بۇل شەشىمگە قارسىمىز. وتىنەمىز, كومەكتەسىڭىزدەر!” – دەدى تاربيەلەنۋشىلەر.

بۇل جاعدايعا بايلانىستى الماتى وبلىسىنىڭ بىلىم باسقارماسى تۇسىنىكتەمە بەردى. باسقارما وكىلدەرى بالالار ۇيىنىڭ تاربيەلەنۋشىلەرىمەن كەزدەسىپ, جاڭا عيماراتتىڭ قۇرىلىسى جۇرىپ جاتقانىن ايتتى.

باسقارما باسشىسى سالتانات بەسپاەۆا:
“جاڭا مەكەمە بارلىق قاجەتتى جابدىقتارمەن قامتىلادى. بالالار ۇشىن قاۋىپسىز ارى جايلى ورتا جاسايمىز. بارلىق ماسەلە بىزدىڭ باقىلاۋىمىزدا.”

جاڭا عيمارات 240 ورىنعا ەسەپتەلگەن. قۇرىلىس 1963 جىلى سالىنعان ەسكى عيماراتتىڭ اپاتتى جاعدايىنا بايلانىستى جۇرگىزىلۋدە. كەشەن 900 ورىندىق مەكتەپتىڭ جانىندا ورنالاسادى, ال تاربيەلەنۋشىلەر ۇشىن ارنايى 14 ورىندىق اۆتوبۋس بولىندى.

بۇعان قوسا, تاربيەلەنۋشىلەر 21 ناۋرىزدا قوناەۆتا وتەتىن ناۋرىز مەيرامىنا شاقىرىلدى.