Almatı oblıstıq №1 balalar üyiniñ tärbielenuşileri mekemeniñ Almatıdan Qonaevqa köşiriletinine qarsı şığıp, äleumettik jelide beyneündeu jasadı. Olar ağaştardıñ kesilip, aumaqtıñ bwzılıp jatqanın aytıp, kömek swradı, dep habarlaydı Shalqar.kz.

“Bizdi qaladağı üyimizden alısqa, türmesi bar Qonaevqa jibergisi keledi. Bwl şeşimge qarsımız. Ötinemiz, kömektesiñizder!” – dedi tärbielenuşiler.

Bwl jağdayğa baylanıstı Almatı oblısınıñ bilim basqarması tüsinikteme berdi. Basqarma ökilderi balalar üyiniñ tärbielenuşilerimen kezdesip, jaña ğimarattıñ qwrılısı jürip jatqanın ayttı.

Basqarma basşısı Saltanat Bespaeva:
“Jaña mekeme barlıq qajetti jabdıqtarmen qamtıladı. Balalar üşin qauipsiz äri jaylı orta jasaymız. Barlıq mäsele bizdiñ baqılauımızda.”

Jaña ğimarat 240 orınğa eseptelgen. Qwrılıs 1963 jılı salınğan eski ğimarattıñ apattı jağdayına baylanıstı jürgizilude. Keşen 900 orındıq mekteptiñ janında ornalasadı, al tärbielenuşiler üşin arnayı 14 orındıq avtobus bölindi.

Bwğan qosa, tärbielenuşiler 21 naurızda Qonaevta ötetin Naurız meyramına şaqırıldı.