استانا حالىقارالىق اۋەجايى ماڭىندا ورنالاسقان قابانباي باتىر داڭعىلىنداعى LRT جۇيەسىنىڭ العاشقى ستانساسى دايىن كۇيىندە حالىققا تانىستىرىلدى. «City Transportation Systems» جشس باسپاسوز قىزمەتىنىڭ مالىمەتىنشە, ستانسانىڭ ارلەندىرۋ جۇمىستارى تولىعىمەن اياقتالعان, ال مەتالل كونسترۋكتسييالار مونتاجدالىپ, سىرتى ارنايى ماتەريالدارمەن قاپتالدى, دەپ حابارلايدى Shalqar.kz.

بۇل جاڭا ستانسا تۇرعىندارعا ەسكالاتورلار, ليفتتەر مەن ىڭعايلى ينتەراكتيۆتى ەكراندار ارقىلى قىزمەت كورسەتەدى. LRT جەلىسى 18 ستانسادان تۇرادى, ونىڭ ىشىندە 11 ستانسا جەر استى, 7 ستانسا جەر ۇستى دەڭگەيىندە ورنالاسقان. جوبا بارىسىندا جول ورتاسىنا ورنالاسقان ستانسالار ەرەكشە نازارعا الىنعان. سىعاناق, ش.قالداياقوۆ كوشەلەرى مەن «نۇرلى جول» تەمىرجول ۆوكزالى اۋدانىندا جەتى ستانساعا ەكى-ەكىدەن جەرۇستى وتكەلدەرى سالىناتىن بولادى, بۇل جولاۋشىلاردىڭ قاۋىپسىزدىگىن قامتاماسىز ەتەدى.