Wlttıq öner – halıqtıñ ruhani mwrası. Al onı saqtap, jaña beleske köteru – nağız şeberlerdiñ eñbegi. Sonday sirek darın ieleriniñ biri – Ikramjan Rafikov. Ol 30 jıldan astam uaqıtın zergerlik önerge arnap, qazaqtıñ dästürli äşekey bwyımdarın jañğırtıp keledi, dep habarlaydı Shalqar.kz tilşisi egemen.kz saytına silteme jasap.

Zergerdiñ qolınan şıqqan sırğa, alqa, bilezik, jüzik pen beldikter tek HVIII–XX ğasırlardağı qazaq mädenietine ğana tän emes, sonımen qatar saq däuiriniñ örnekterin de boyına siñirgen. Osınday şeberlik pen wqıptılıqtı talap etetin önerge büginde jastardıñ qızığuşılığı tömendep baradı.

«Qazirgi jastardıñ köbisi blogerlikti tañdap, jıldam tabıs tapqısı keledi. Al zergerlik – tözim men tabandılıqtı qajet etetin käsip. Bwl önerdi igeru üşin kemi 3–4 jıl qajırlı eñbek etu kerek», – deydi Ikramjan Rafikov.

Zerger şeberligi tek elimizde ğana emes, älemdik deñgeyde de moyındaldı. Ol Nepal, Istanbwl, Qoqan, Taşkent sındı qalalarda ötken halıqaralıq körmeler men festival'derde qazaqtıñ zergerlik önerin nasihattap, jüldeli orındarğa ie bolğan.

2019 jılı Vaşingtonda ötken düniejüzilik körmede Qazaqstan atınan qatısıp, wlttıq önerimizdi älemge äygiledi. Al 2021 jılı N'yu-Yorkte ötken erekşe bayqauda HVIII ğasır stilinde jasalğan alqası joğarı bağalanıp, «Älemniñ qolönerşisi» atağın ielendi.

«Bwl bayqauğa qatısu üşin äşekeydi öziñ emes, tek tuındıñdı jiberu qajet boldı. Qazılar alqası qazaqtıñ oyu-örnegine tänti bolıp, birneşe ret habarlasıp, olardıñ mağınasın swradı», – deydi şeber.

Zerger öneri är halıqtıñ mädenietine say özindik erekşelikterge ie. Ikramjan Rafikovtıñ aytuınşa, özbek zergerleri köbine altın bwyımdarğa män berse, qazaq şeberleri kümisti köbirek qoldanadı. Sonday-aq elimizdiñ är öñirindegi zergerlik bwyımdar körşi halıqtardıñ mädeni ıqpalına baylanıstı özindik erekşelikterge ie.

Şeberdiñ armanı – qazaq zergerliginiñ mwraların wrpaqtan-wrpaqqa jetkizu. «Adam ömirden ötedi, biraq onıñ artında qalğan öneri men izgi amaldarı mäñgi jasaydı», – deydi Ikramjan aka.