Түркияның саяси сахнасында маңызды өзгерістер орын алуда. Жексенбі күні өткен Республикалық Халық партиясының (РХП) праймеризінде 15 миллионнан астам адам қатысып, қамауға алынған және қызметінен шеттетілген Ыстамбұл мэрі Экрем Имамоглуна қолдау көрсетті. Осылайша, ол РХП-ның ресми президенттік үміткері болып жарияланды, деп хабарлайды Shalqar.kz.

Сауалнама ұйымдастырушыларының мәліметінше, РХП мүшелері жаппай дауыс беріп, партияның көшбасшысы ретінде Имамоглуды таңдады. Партия жетекшісі Озгюр Озель бұл нәтижені елдегі қазіргі саяси ахуалға халықтың нақты жауабы деп бағалады.

— 23 наурызда партиямыздың 1,65 миллион мүшесі болашақ президентімізге дауыс берді. Сондай-ақ, халықтан да белсенділік танытуын сұрадық. Нәтижесінде 13,21 миллион адам Имамоглуға дауыс берді. Бұл – нағыз өзгерістің бастауы, — деді Озель.

Ол Түркия президенті Режеп Тайып Ердоғанды мерзімінен бұрын сайлау өткізуге және Имамоглумен бәсекеге түсуге шақырды.

Сайлау нәтижелері жарияланғаннан кейін Экрем Имамоглу Силиври түрмесінен алғашқы жазбасын жариялап, қолдау білдірген азаматтарға алғысын білдірді:

— Түркия тарихындағы ең ауқымды ішкі сайлау өтті. 15 миллион азамат дауыс берді. Бұл – үкіметтің қысымына, экономикалық дағдарысқа, заңсыздыққа қарсы елдің жауабы, — деп жазды ол.

Ал Ыстамбұл мен Түркияның басқа қалаларында Имамоглудың тұтқындалуына қарсы наразылық бес күннен бері басылмай келеді.

Reuters агенттігінің хабарлауынша, кеше түнде Ыстамбұл көшелеріне жарты миллионға жуық адам шыққан. Полициямен қақтығыстар орын алған.

Саяси дағдарыс ел экономикасына да салқынын тигізді. Ыстамбұл биржасының негізгі индексі үш күн ішінде 16%-ға төмендеді. Үкімет ұлттық валютаны тұрақтандыру үшін миллиардтаған доллар жұмсауға мәжбүр болды.

— Біз нарықтың тұрақтылығы үшін барлық қажетті шараларды қабылдаймыз. Жалған ақпараттарға сенбеңіздер, — деп мәлімдеді Түркияның қаржы министрі Мехмет Шимшек.

Еске сала кетейік, Ыстамбұл мэрі Экрем Имамоглу қаржылық қылмыс жасады деген айыппен қамауға алынған болатын. Алайда сот оған терроризм бойынша тағылған айыптарды қабылдамады. 23 наурызда Түркияның Ішкі істер министрлігі оны қызметінен уақытша шеттету туралы шешім қабылдағанын хабарлады.

Оппозиция өкілдері бұл жағдай Түркияда мерзімінен бұрын сайлау өткізу қажеттігін көрсететінін айтады. Анкара мэрі Мансур Яваш та халықты өзгерістер үшін күресуге шақырды.