Павлодар облысының Ақтоғай ауданындағы Шолақсор ауылы су астында қалуы мүмкін. Облыс әкімі Асайын Байханов пен өңірлік ТЖ департаментінің басшысы Рүстамбек Амрин аймақтағы су тасқыны жағдайын бағалау үшін Ақмола облысындағы Сілеті су қоймасына әуеден барлау жүргізді, деп хабарлайды Shalqar.kz.

Мамандардың мәліметінше, Сілеті су қоймасындағы су деңгейі 87%-ға жеткен, яғни 201 млн текше метр су жиналған. Су қоймасына құйылатын және сыртқа ағатын су көлемі мұқият зерттеліп, тасқын қаупі есептелді.

“Ақмола облысындағы Сілеті су қоймасынан су жіберу көлемінің ұлғаюы салдарынан Шолақсор ауылын су басу қаупі бар. Осыған байланысты барлық қауіпті аймақтар тексерілді. Сілеті өзенінде санитарлық су жіберу жұмыстары мен тасқынға қарсы шаралардың дайындығы пысықталды”, – деп мәлімдеді жергілікті билік өкілдері.

Құзырлы органдар қауіптің алдын алу үшін қажетті шараларды қолға алып жатыр. Су тасқынының салдарын барынша азайту мақсатында азаматтық қорғау қызметтері толық дайындыққа келтірілді.