پاۆلودار وبلىسىنىڭ اقتوعاي اۋدانىنداعى شولاقسور اۋىلى سۋ استىندا قالۋى مۇمكىن. وبلىس اكىمى اسايىن بايحانوۆ پەن وڭىرلىك تج دەپارتامەنتىنىڭ باسشىسى رۇستامبەك امرين ايماقتاعى سۋ تاسقىنى جاعدايىن باعالاۋ ۇشىن اقمولا وبلىسىنداعى سىلەتى سۋ قويماسىنا اۋەدەن بارلاۋ جۇرگىزدى, دەپ حابارلايدى Shalqar.kz.

مامانداردىڭ مالىمەتىنشە, سىلەتى سۋ قويماسىنداعى سۋ دەڭگەيى 87%-عا جەتكەن, ياعني 201 ملن تەكشە مەتر سۋ جينالعان. سۋ قويماسىنا قۇيىلاتىن جانە سىرتقا اعاتىن سۋ كولەمى مۇقييات زەرتتەلىپ, تاسقىن قاۋپى ەسەپتەلدى.

“اقمولا وبلىسىنداعى سىلەتى سۋ قويماسىنان سۋ جىبەرۋ كولەمىنىڭ ۇلعايۋى سالدارىنان شولاقسور اۋىلىن سۋ باسۋ قاۋپى بار. وسىعان بايلانىستى بارلىق قاۋىپتى ايماقتار تەكسەرىلدى. سىلەتى وزەنىندە سانيتارلىق سۋ جىبەرۋ جۇمىستارى مەن تاسقىنعا قارسى شارالاردىڭ دايىندىعى پىسىقتالدى”, – دەپ مالىمدەدى جەرگىلىكتى بيلىك وكىلدەرى.

قۇزىرلى ورگاندار قاۋىپتىڭ الدىن الۋ ۇشىن قاجەتتى شارالاردى قولعا الىپ جاتىر. سۋ تاسقىنىنىڭ سالدارىن بارىنشا ازايتۋ ماقساتىندا ازاماتتىق قورعاۋ قىزمەتتەرى تولىق دايىندىققا كەلتىرىلدى.