Pavlodar oblısınıñ Aqtoğay audanındağı Şolaqsor auılı su astında qaluı mümkin. Oblıs äkimi Asayın Bayhanov pen öñirlik TJ departamentiniñ basşısı Rüstambek Amrin aymaqtağı su tasqını jağdayın bağalau üşin Aqmola oblısındağı Sileti su qoymasına äueden barlau jürgizdi, dep habarlaydı Shalqar.kz.

Mamandardıñ mälimetinşe, Sileti su qoymasındağı su deñgeyi 87%-ğa jetken, yağni 201 mln tekşe metr su jinalğan. Su qoymasına qwyılatın jäne sırtqa ağatın su kölemi mwqiyat zerttelip, tasqın qaupi esepteldi.

“Aqmola oblısındağı Sileti su qoymasınan su jiberu köleminiñ wlğayuı saldarınan Şolaqsor auılın su basu qaupi bar. Osığan baylanıstı barlıq qauipti aymaqtar tekserildi. Sileti özeninde sanitarlıq su jiberu jwmıstarı men tasqınğa qarsı şaralardıñ dayındığı pısıqtaldı”, – dep mälimdedi jergilikti bilik ökilderi.

Qwzırlı organdar qauiptiñ aldın alu üşin qajetti şaralardı qolğa alıp jatır. Su tasqınınıñ saldarın barınşa azaytu maqsatında azamattıq qorğau qızmetteri tolıq dayındıqqa keltirildi.