تۇركييانىڭ ساياسي ساحناسىندا ماڭىزدى وزگەرىستەر ورىن الۋدا. جەكسەنبى كۇنى وتكەن رەسپۋبليكالىق حالىق پارتيياسىنىڭ (رحپ) پرايمەريزىندە 15 ميلليوننان استام ادام قاتىسىپ, قاماۋعا الىنعان جانە قىزمەتىنەن شەتتەتىلگەن ىستامبۇل مەرى ەكرەم يماموگلۋنا قولداۋ كورسەتتى. وسىلايشا, ول رحپ-نىڭ رەسمي پرەزيدەنتتىك ۇمىتكەرى بولىپ جارييالاندى, دەپ حابارلايدى Shalqar.kz.

ساۋالناما ۇيىمداستىرۋشىلارىنىڭ مالىمەتىنشە, رحپ مۇشەلەرى جاپپاي داۋىس بەرىپ, پارتييانىڭ كوشباسشىسى رەتىندە يماموگلۋدى تاڭدادى. پارتييا جەتەكشىسى وزگيۋر وزەلь بۇل ناتيجەنى ەلدەگى قازىرگى ساياسي احۋالعا حالىقتىڭ ناقتى جاۋابى دەپ باعالادى.

— 23 ناۋرىزدا پارتييامىزدىڭ 1,65 ميلليون مۇشەسى بولاشاق پرەزيدەنتىمىزگە داۋىس بەردى. سونداي-اق, حالىقتان دا بەلسەندىلىك تانىتۋىن سۇرادىق. ناتيجەسىندە 13,21 ميلليون ادام يماموگلۋعا داۋىس بەردى. بۇل – ناعىز وزگەرىستىڭ باستاۋى, — دەدى وزەلь.

ول تۇركييا پرەزيدەنتى رەجەپ تايىپ ەردوعاندى مەرزىمىنەن بۇرىن سايلاۋ وتكىزۋگە جانە يماموگلۋمەن باسەكەگە تۇسۋگە شاقىردى.

سايلاۋ ناتيجەلەرى جارييالانعاننان كەيىن ەكرەم يماموگلۋ سيليۆري تۇرمەسىنەن العاشقى جازباسىن جارييالاپ, قولداۋ بىلدىرگەن ازاماتتارعا العىسىن بىلدىردى:

— تۇركييا تاريحىنداعى ەڭ اۋقىمدى ىشكى سايلاۋ وتتى. 15 ميلليون ازامات داۋىس بەردى. بۇل – ۇكىمەتتىڭ قىسىمىنا, ەكونوميكالىق داعدارىسقا, زاڭسىزدىققا قارسى ەلدىڭ جاۋابى, — دەپ جازدى ول.

ال ىستامبۇل مەن تۇركييانىڭ باسقا قالالارىندا يماموگلۋدىڭ تۇتقىندالۋىنا قارسى نارازىلىق بەس كۇننەن بەرى باسىلماي كەلەدى.

Reuters اگەنتتىگىنىڭ حابارلاۋىنشا, كەشە تۇندە ىستامبۇل كوشەلەرىنە جارتى ميلليونعا جۋىق ادام شىققان. پوليتسييامەن قاقتىعىستار ورىن العان.

ساياسي داعدارىس ەل ەكونوميكاسىنا دا سالقىنىن تيگىزدى. ىستامبۇل بيرجاسىنىڭ نەگىزگى يندەكسى ۇش كۇن ىشىندە 16%-عا تومەندەدى. ۇكىمەت ۇلتتىق ۆاليۋتانى تۇراقتاندىرۋ ۇشىن ميللياردتاعان دوللار جۇمساۋعا ماجبۇر بولدى.

— بىز نارىقتىڭ تۇراقتىلىعى ۇشىن بارلىق قاجەتتى شارالاردى قابىلدايمىز. جالعان اقپاراتتارعا سەنبەڭىزدەر, — دەپ مالىمدەدى تۇركييانىڭ قارجى مينيسترى مەحمەت شيمشەك.

ەسكە سالا كەتەيىك, ىستامبۇل مەرى ەكرەم يماموگلۋ قارجىلىق قىلمىس جاسادى دەگەن ايىپپەن قاماۋعا الىنعان بولاتىن. الايدا سوت وعان تەرروريزم بويىنشا تاعىلعان ايىپتاردى قابىلدامادى. 23 ناۋرىزدا تۇركييانىڭ ىشكى ىستەر مينيسترلىگى ونى قىزمەتىنەن ۋاقىتشا شەتتەتۋ تۋرالى شەشىم قابىلداعانىن حابارلادى.

وپپوزيتسييا وكىلدەرى بۇل جاعداي تۇركييادا مەرزىمىنەن بۇرىن سايلاۋ وتكىزۋ قاجەتتىگىن كورسەتەتىنىن ايتادى. انكارا مەرى مانسۋر ياۆاش تا حالىقتى وزگەرىستەر ۇشىن كۇرەسۋگە شاقىردى.