2025 жылдың 31 наурызы мен 1 сәуірі аралығында Словения Президенті Наташа Пирц-Мусар Қазақстанға ресми сапармен келеді, деп хабарлайды Shalqar.kz.

Бұл маңызды сапар аясында Мемлекет басшысы Қасым-Жомарт Тоқаевпен екіжақты келіссөздер өтеді. Кездесуде сауда-экономикалық, инвестициялық, көлік және мәдени-гуманитарлық салалардағы әріптестікті одан әрі дамыту мәселелері талқыланбақ.

Қазақстан мен Словения арасында іскерлік қарым-қатынасты тереңдету мақсатында арнайы Қазақстан-Словения бизнес-форумы ұйымдастырылады. Форум өзара тиімді серіктестіктер құруға және жаңа жобаларды іске асыруға ықпал етпек.

Айта кетейік, Словения экологияны қорғау және орнықты даму салаларында белсенді жұмыс істеп келеді. Сондықтан бұл сапар аталған бағыттар бойынша тәжірибе алмасуға және ортақ бастамаларды жүзеге асыруға зор мүмкіндік береді.

Кездесулер нәтижесінде екі ел арасындағы ынтымақтастықты одан әрі нығайтуға бағытталған бірқатар маңызды келісімдерге қол қойылуы күтілуде.