Тбилисиде өткен көру қабілеті зақымдалған спортшылар арасындағы пара дзюдодан әлем кубогында қазақстандық Айдана Ғазизқызы J2 санаты бойынша 70 келіден жоғары салмақта топ жарды. Ол барлық қарсыласын айқын басымдықпен жеңіп, Қазақстан қоржынына алтын медаль салды, деп хабарлайды Shalqar.kz.

Жалпы бұл Қазақстан құрамасы үшін үшінші алтын болды. Сонымен қатар, J1 санаты бойынша 95 келіден жоғары салмақта Бағланбек Оналбек күміс медаль иеленсе, Ерлан Өтепов қола жүлдеге қол жеткізді.

Қазақстандық парадзюдошылар бұл сайысты 3 алтын, 2 күміс және 1 қола медальмен аяқтап, жалпыкомандалық есепте төртінші орынға тұрақтады.

Айта кетейік, бұған дейін де отандық спортшылар әлем кубогында үш жүлде жеңіп алған болатын. Бұл жеңістер қазақстандық парадзюдошылардың халықаралық ареналардағы беделін одан әрі арттыра түсті.