Мьянмада 28 наурыз күні болған жойқын жер сілкіністері салдарынан қаза тапқандар саны артып, 1644 адамға жетті. Тағы 3408 адам түрлі жарақат алған, ал 139 адам із-түзсіз жоғалғандар қатарында, деп хабарлайды Shalqar.kz сайты BBC агенттігіне сілтеме жасап.

Қайғылы оқиға жайлы не белгілі?

АҚШ Геологиялық қызметінің (USGS) мәліметінше, жұма күні Мьянмада 7,7 және 6,4 магнитудалы екі жойқын жер сілкінісі тіркелді.
 • Бірінші жер сілкінісі жергілікті уақытпен 12:50-де, Мьянманың орталық бөлігінде, 10 шақырым тереңдікте болған.
 • Екіншісі араға 12 минут салып қайталанған.

Жер сілкінісінің эпицентрі елдегі екінші ірі қала Мандалайдан (1,2 млн адам) 16 шақырым жерде, Сагайн аймағында орналасқан.

Құтқару жұмыстары жалғасуда

Мьянма билігінің хабарлауынша, құтқарушылар үйінділерді аршуды жалғастыруда. Мандалайдағы құтқару қызметінің өкілі BBC-ге “зиян өте үлкен” екенін айтты. Афтершоктар жағдайды одан әрі қиындатып жатыр.

Жерасты дүмпулері көршілес Таиланд пен Қытайда да сезілген. Таиландта жер сілкінісіне байланысты эвакуация жұмыстары жүргізіліп, Бангкокта бірнеше ғимарат құлады. Елдің премьер-министрі Бангкокты “төтенше жағдай аймағы” деп жариялады.

Айта кетейік, осыған дейін Мьянмада магнитудасы 7,9 болатын тағы бір жер сілкінісі тіркелген.

Құтқару жұмыстары әлі жалғасуда, сондықтан қаза тапқандар санының артуы мүмкін.