Әлемдік мұнай нарығында баға қайта көтерілді. Сәрсенбі күні Brent маркалы мұнайдың фьючерстік бағасы шамамен 1,4%-ға өсіп, барреліне 92,75 долларға жетті. Ал АҚШ-тың WTI маркалы мұнайы 0,7%-ға қымбаттап, барреліне 86,61 долларды құрады.

Reuters агенттігінің ақпараты бойынша, мұнай бағасының өсуіне Таяу Шығыстағы геосаяси жағдайдың шиеленісуі және Иран төңірегіндегі келіссөздердің нәтижесіне қатысты белгісіздік әсер еткен. Иран тарапы байытылған ядролық материалды елден шығармайтынын мәлімдеген. Бұл жағдай АҚШ пен Иран арасындағы дипломатиялық келісімге қатысты үмітті әлсіретті.

Сонымен қатар, Ормуз бұғазындағы кеме қатынасының қауіпсіздігіне байланысты алаңдаушылық та мұнай жеткізіліміне қатысты тәуекелдерді күшейтіп отыр. Аталған бұғаз әлемдік мұнай тасымалы үшін стратегиялық маңызға ие.

Сарапшылардың пікірінше, Таяу Шығыстағы жағдайдың одан әрі ушығуы мұнай бағасының құбылуына әсер етуі мүмкін. Дегенмен, нарықтағы баға геосаяси оқиғалармен қатар, мұнай ұсынысы мен сұранысына да тәуелді.