يسپانييانىڭ بارسەلونا قالاسىندا تۇرعىن ۇي باعاسىنىڭ قىمباتتاۋى مەن ومىر سۇرۋ قۇنىنىڭ وسۋىنە قارسى وتكەن جاپپاي نارازىلىق شەرۋى كەزىندە پوليتسييا مەن دەمونسترانتتار اراسىندا قاقتىعىس بولدى.

11 قاراشادا يسپانييانىڭ بىرقاتار قالاسىندا جالپىۇلتتىق ەرەۋىل ۇيىمداستىرىلىپ, مىڭداعان ادام كوشەگە شىقتى. نارازىلىق بىلدىرۋشىلەر باسپانا باعاسىن تومەندەتۋدى, جالداۋ اقىسىنا شەكتەۋ قويۋدى جانە حالىقتىڭ الەۋمەتتىك جاعدايىن جاقسارتۋدى تالاپ ەتتى. بارسەلوناداعى شەرۋ باستاپقىدا بەيبىت سيپاتتا وتتى. الايدا كەشكى ۋاقىتتا جاعداي شيەلەنىسىپ, كەيبىر قاتىسۋشىلار دۇكەندەردىڭ تەرەزەلەرىن سىندىرعان, قوقىس كونتەينەرلەرىن ورتەگەن جانە پوليتسييا قىزمەتكەرلەرىنە پيروتەحنيكالىق زاتتار لاقتىرعان. قوعامدىق تارتىپتى قالپىنا كەلتىرۋ ماقساتىندا پوليتسييانىڭ ارنايى بولىمشەلەرى جۇمىلدىرىلدى. قالا بيلىگىنىڭ مالىمەتىنشە, وقيعاعا بايلانىستى بىرنەشە ادام ۇستالعان. بارسەلونا مەرى جاۋمە كوللبوني قوعامدىق تارتىپتى بۇزۋ ارەكەتتەرىن ايىپتاپ, مۇنداي ارەكەتتەرگە جول بەرىلمەيتىنىن مالىمدەدى.

ايتا كەتەيىك, تۇرعىن ۇي باعاسىنىڭ وسۋى مەن جالداۋ اقىسىنىڭ قىمباتتاۋى يسپانيياداعى وزەكتى الەۋمەتتىك ماسەلەلەردىڭ بىرى بولىپ وتىر. بۇل جاعداي سوڭعى جىلدارى حالىق نارازىلىعىنىڭ كۇشەيۋىنە سەبەپ بولۋدا.