Äl-Farabi atındağı Qazaq wlttıq universitetiniñ sahnasında jürekterdi terbegen erekşe körinis orın aldı. Wlı aqın Abay Qwnanbaywlınıñ 180 jıldığına oray 1000 student pen oqıtuşı bir mezette «Közimniñ qarası» jäne «Jelsiz tünde jarıq ay» änderin hormen şırqadı, dep habarlaydı Shalqar.kz tilşisi Ğılım jäne joğarı bilim ministrligine silteme jasap.

Universitet rektorı Janseyit Tüymebaev Abay mwrasın nasihattau – ärbir azamattıñ parızı ekenin atap ötti. Ol qazirgi jastardıñ danışpan oyşıldıñ şığarmalarına degen qızığuşılığı artıp kele jatqanın erekşe ayttı.

«Prezident Qasım-Jomart Toqaev Wlı Abaydıñ 180 jıldığın joğarı deñgeyde atap ötuge tapsırma bergen bolatın. Osığan oray QazWU qabırğasında ğılımi konferenciyalar, simpoziumdar, kezdesuler men tanımdıq şaralar belsendi ötude. Universitet janındağı Abay ğılımi-zertteu institutı 2009 jıldan beri tabıstı jwmıs istep keledi. Instituttıñ eñbegimen 10 tomdıq «Abaytanu antologiyası» jarıqqa şıqtı», – dedi rektor.

Muzıka men ruhtıñ üylesken bwl şara – Abay älemine degen qwrmettiñ tağı bir ayqın körinisi.