Қалибек Қуанышбаев атындағы Қазақ ұлттық музыкалық драма театры көрерменге ерекше премьера ұсынды. Qalleki театр лабораториясының шығармашылық жобасы аясында Бертольт Брехттің әйгілі «Кавказдағы борлы шеңбер» пьесасы негізінде сахналанған «Шеңбер» қойылымы көрерменнің жүрегінен орын алды, деп хабарлайды Shalqar.kz тілшісі Сыртқы Істер министрлігіне сілтеме жасап.

Эпикалық драма жанрындағы бұл қойылымда ананың балаға деген махаббаты, әділет пен адамгершілік сынды мәңгілік құндылықтар тереңнен қозғалған. Спектакль оқиғаны тек сахнада көрсетіп қоймай, көрерменді бірге ойлануға, ішкі түйсігімен таразылауға жетелейді.

Қойылымда Брехт драматургиясына тән оқшаулану әдісі кеңінен қолданылып, актерлер мен көрермен арасындағы байланыс ерекше форматта құрылды. Бұл тәсіл оқиғаға сырт көзбен қарап, өмірлік шешімдерге басқа қырынан қарауға мүмкіндік береді.

Qalleki театр лабораториясының кезекті жұмысы — заманауи театр тілімен ұсынылған рухани ізденіс, көрермен мен өнер арасындағы шынайы диалог.