وسى جازدا قازاقستانداعى تەاترلار, مۇراجايلار, قورىقتار مەن ۇلتتىق پاركتەر بالالار ۇشىن تەگىن جۇمىس ىستەيدى. تيىستى تاپسىرمانى پرەمьەر-مينيستر ولجاس بەكتەنوۆ بەردى, دەپ حابارلايدى Shalqar.kz.

20 مامىرداعى ۇكىمەت وتىرىسىندا بالالاردىڭ جازعى دەمالىسىن تيىمدى ۇيىمداستىرۋ ماسەلەسى قارالدى. پرەمьەر-مينيستردىڭ ايتۋىنشا, مادەنيەت پەن تابيعاتتى تانىپ-بىلۋ – ار بالانىڭ قۇقىعى.

– بالالار قازاقستاننىڭ تابيعي جانە مادەني الۋانتۇرلىلىگىن كورۋى كەرەك. مادەنيەت مينيسترلىگىنە جازعى دەمالىس كەزىندە بالالاردىڭ مۇراجايلار, تەاترلار, قورىقتار مەن ۇلتتىق پاركتەرگە تەگىن بارۋىن قامتاماسىز ەتۋ تاپسىرىلدى, – دەدى ولجاس بەكتەنوۆ.

بالالار دەمالىسى – مەملەكەتتىك باقىلاۋدا

ۇكىمەت باسشىسى جاز مەزگىلىندە بالالاردىڭ دەمالىسى مەن قاۋىپسىزدىگىنە بارىنشا مان بەرۋدى تاپسىردى. جاۋاپتى مينيسترلىكتەر مەن اكىمدىكتەر مىنا باعىتتار بويىنشا جۇمىس ىستەيدى:
 • اكىمدىكتەر – لاگەرьلەردىڭ سانيتارلىق, ورت جانە قاۋىپسىزدىك تالاپتارىنا سايكەستىگىن قامتاماسىز ەتەدى;
 • دەنساۋلىق ساقتاۋ مينيسترلىگى – بالالاردىڭ تاعامىنا تۇراقتى سانيتارلىق باقىلاۋ جۇرگىزەدى;
 • تجم – سۋ قويمالارى مەن باسسەيندەردەگى قۇتقارۋ قۇرالدارىن تەكسەرىپ, قىزمەتكەرلەردى ارنايى وقىتۋدان وتكىزەدى;
 • ىىم – بارلىق لاگەرьلەر مەن ىس-شارا وتەتىن ورىندارعا ۋچاسكەلىك ينسپەكتورلار بەكىتەدى.

– بالالارمەن بولاتىن جول-كولىك وقيعالارىن الدىن الۋعا ەرەكشە نازار اۋدارىلۋعا تيىس. ۇيىمداستىرىلماعان سپورتشى بالالاردىڭ ساپارى قايعىلى سالدارلارعا اكەلگەنى بارىمىزگە مالىم. سوندىقتان سپورتشى بالالار وز ەلدى مەكەندەرىنىڭ سىرتىنا تيىستى كەلىسىمدەر مەن رۇقساتتارسىز جانە پاترۋلьدىك پوليتسييانىڭ سۇيەمەلدەۋىنسىز شىعۋىنا جول بەرمەۋدى تاپسىرامىن, – دەدى پرەمьەر-مينيستر.

بارلىق ۇيىمداستىرۋ جۇمىستارى 1 ماۋسىمعا دەيىن اياقتالۋى تيىس.