Қазақстанда 22 мамыр мен 1 маусым аралығында алғаш рет Халықаралық балаларды қорғау күніне арналған ұлттық ауқымдағы науқан өтуде. «Қазақстан балалары» деп аталған бұл бастама – мемлекет басшысы Қасым-Жомарт Тоқаевтың Ұлттық құрылтайда айтқан тапсырмасына сәйкес қолға алынған, деп хабарлайды Shalqar.kz тілшісі Сыртқы Істер министрлігіне сілтеме жасап.

Президент атап өткендей, балаларға қамқор болу – барша қоғамның ортақ міндеті. Бұл науқанның негізгі мақсаты – балалардың қауіпсіз, мейірімді ортада өмір сүруіне жағдай жасау, бала құқығын қорғау мен олардың мәселелеріне қоғам назарын аудару.

Мереке алдындағы іс-шаралар «Әкем – тірегім, анам – жүрегім» ұранымен басталды. ҚР Мәдениет және ақпарат министрлігінің ұйымдастыруымен өткен бұл науқан отбасы рөлін айқындауға бағытталған.

Еліміздің барлық өңірінде:
 • Театрлық және концерттік бағдарламалар
 • Балаларға арналған спорттық жарыстар мен шығармашылық байқаулар
 • Музейлер мен кітапханаларда арнайы көрмелер
 • Отбасын қолдау орталықтарында ашық есік күндері өтті.

Алғашқы күннің өзінде «Қазақстан балалары» науқанына ел бойынша жарты миллионнан астам адам қатысып, қоғамның бала болашағына бей-жай қарамайтынын көрсетті.