وڭتۇستىك كورەيا استاناسى سەۋلدە وتكەن Seoul International Tourism Fair (SITF 2025) حالىقارالىق كورمەسىندە الماتى قالاسى ەرەكشە كوزگە تۇستى. ازيياداعى ەڭ ىرى تۋريزم كورمەسىنە الەمنىڭ 70 ەلىنەن 800-گە جۋىق تۋريزم سالاسىنىڭ وكىلدەرى قاتىستى, دەپ حابارلايدى Shalqar.kz.

الماتى بۇرىشى – قازاق ۇلتتىق ونەرى مەن مادەنيەتىنەن سىر شەرتەتىن ەرەكشە ايماققا اينالدى. قوناقتار دومبىراشىلاردىڭ ونەرىن, قولدانبالى ونەر شەبەرلەرىن, ۇلتتىق كيىمدەر مەن تاعامداردى تاماشالاپ, قازاق رۋحىنىڭ اۋانىمەن تانىستى.

كورمەنىڭ جارقىن ساتتەرىنىڭ بىرى – VR-كوزىلدىرىك ارقىلى الماتىعا ۆيرتۋالدى ساياحات جاساۋ مۇمكىندىگى بولدى. بۇل – يممەرسيۆتى ماركەتينگ تاسىلىن قولدانعان ەلىمىزدىڭ العاشقى تۋريزم جوبالارىنىڭ بىرى.

ناتيجەسىندە, الماتى بۇرىشى «SITF 2025 ستەندىنىڭ ۇزدىك ديزاينى» ماراپاتىنا يە بولدى. بۇدان بولەك, كورمە اياسىندا شەتەلدىك جانە وتاندىق تۋروپەراتورلار اراسىندا 30 كەلىسىم جاسالىپ, الماتىعا 21 مىڭعا جۋىق تۋريست تارتۋ جوسپارلانىپ وتىر.

كورمە قوناقتارىنىڭ بىرى, سەۋل تۇرعىنى كيم دجييۋن:

«الماتى – تاۋدىڭ ەتەگىندەگى ەرەكشە قالا. ۇلتتىق بولمىسى ساقتالعانىمەن, زاماناۋي قالانىڭ قارقىنى سەزىلەدى. بىر كۇنى سول قالاعا بارىپ, بارىن وز كوزىممەن كورەمىن دەپ ۇمىتتەنەمىن», – دەپ بولىستى.

ايتا كەتەيىك, وڭتۇستىك كورەيادان كەلەتىن تۋريستەر سانى جىل سايىن ارتىپ كەلەدى. 2024 جىلى ولاردىڭ سانى 20 مىڭنان اسىپ, وتكەن جىلمەن سالىستىرعاندا 3,2%-عا كوبەيدى.