الماتىدا بالالارعا عىلىمدى ويىن ارقىلى ۇيرەتەتىن بىرەگەي جوبا قولعا الىندى. قالادا ورتالىق ازييا كەڭىستىگىندەگى العاشقى بالالار عىلىمي مۋزەيىنىڭ قۇرىلىسى جۇرىپ جاتىر. جوبا مەملەكەت باسشىسىنىڭ تاپسىرماسىمەن ىسكە اسىرىلۋدا جانە بۇل باستاما جاس ۇرپاقتىڭ زيياتكەرلىك الەۋەتىن دامىتۋعا باعىتتالعان, دەپ حابارلايدى Shalqar.kz.

STEM-بىلىمگە العاشقى قادام
مۋزەي عىلىم, تەحنولوگييا, ينجەنەرييا جانە ماتەماتيكا (STEM) باعىتتارىنا قىزىعۋشىلىقتى ەرتە جاستان دامىتۋعا كومەكتەسەدى. بۇل قازاقستانداعى تۇڭعىش ينتەراكتيۆتى كەڭىستىك بولماق.

جوبانى جۇزەگە اسىرۋعا الەمدىك تاجىريبەسى مول سينگاپۋر عىلىم ورتالىعى مەن Kingsmen Exhibit PTE LTD كومپانيياسى اتسالىسىپ جاتىر. قۇرىلىس جۇمىستارى قارقىندى جۇرىپ جاتىر: بۇزۋ كەزەڭى اياقتالىپ, ەندى عيمارات قۇرىلىمدارىن كۇشەيتۋ جۇمىستارى باستالعان.

بارلىق بالاعا — تەڭ مۇمكىندىك
مۋزەي ينكليۋزيۆتىلىك پرينتسيپىمەن سالىنىپ جاتىر. مۇندا ەرەكشە بىلىم بەرۋ قاجەتتىلىگى بار بالالار, ونىڭ ىشىندە اۋتيزم سپەكترىندەگى بالالار ۇشىن ارنايى بولمە دە قاراستىرىلعان.

الماتى – عىلىم ورتالىعىنا اينالماق
قالا اكىمى دارحان ساتىبالدى مۋزەي تەك قۇرىلىس نىسانى ەمەس, ۇلتتىڭ ينتەللەكتۋالدىق كەلەشەگىن قالىپتاستىرۋ قۇرالى ەكەنىن اتاپ وتتى.

“بىز الماتىدا جاي عانا مۋزەي ەمەس, بالانىڭ عىلىممەن ەركىن تىلدەسىپ, زەرتتەۋشىلىك الەۋەتىن اشاتىن ورتا قالىپتاستىرىپ جاتىرمىز. بۇل – بولاشاققا جاسالعان ينۆەستيتسييا”, – دەدى اكىم.

جوباعا حالىقارالىق ساراپشىلار, بىلىم بەرۋ ماماندارى جانە ESG-ينتەگراتسييا سالاسىنداعى ساراپشىلار دا تارتىلعان. سينگاپۋر عىلىم ورتالىعىنىڭ باسشىسى دوكتور تيت مەنگ ليم كومانداعا وقىتۋ مەن ۇزدىك ادىستەمەلەردى ەنگىزۋدە كومەك كورسەتۋگە دايىن ەكەنىن بىلدىردى.

مۋزەيدىڭ ەسىگى 2026 جىلى اشىلادى.