اباي قۇنانبايۇلىنىڭ 180 جىلدىق مەرەيتويى تۋعان جەرىندە – اباي اۋدانىنىڭ قاراۋىل اۋىلىندا ەرەكشە سان-سالتاناتپەن اتالىپ وتۋدە. مەرەكەنىڭ باستى ورتالىعى – جيدەباي قورىعى مەن قاراۋىل اۋىلى. مۇندا قازاقى داستۇردىڭ بوياۋى قانىق شارالار ۇيىمداستىرىلىپ, قوناقتار ۇشىن 180 كيىز ۇي تىگىلىپ, ۇلتتىق تاعامدار مەن ونەر كورمەلەرى ۇسىنىلۋدا, دەپ حابارلايدى Shalqar.kz.

اۋىلعا كەلگەن قوناقتار تويدىڭ جوعارى دەڭگەيدە وتكەنىن ايتادى. كيىز ۇيلەردىڭ سانى, قوناقتاردى كۇتىپ الۋ راسىمدەرى مەن مەرەكەلىك باعدارلامالار ەرەكشە اسەر قالدىرعان. مەرەكەگە عىلىم جانە جوعارى بىلىم مينيسترى ساياسات نۇربەك تە ارنايى قاتىسىپ, ابايدىڭ عىلىمداعى ورنى مەن «تولىق ادام» ىلىمى تۋرالى سوز سويلەدى.

ايتا كەتەرلىگى, مەرەيتوي اياسىندا «اباي-شاكارىم» كەسەنەسى جانىندا «ەتنو اۋىل جيدەباي» كەشەنى بوي كوتەرەدى. 60 گەكتارلىق اۋماقتى قامتيتىن جوبا مەتسەنات بەكتاس مەدعاتوۆتىڭ باستاماسىمەن جۇزەگە اسىپ, وڭىردەگى تۋريزمدى دامىتۋعا جانە جيدەبايدى حالىقارالىق دەڭگەيدەگى مادەني-تاريحي ورتالىققا اينالدىرۋعا باعىتتالعان.