Abay Qwnanbaywlınıñ 180 jıldıq mereytoyı tuğan jerinde – Abay audanınıñ Qarauıl auılında erekşe sän-saltanatpen atalıp ötude. Merekeniñ bastı ortalığı – Jidebay qorığı men Qarauıl auılı. Mwnda qazaqı dästürdiñ boyauı qanıq şaralar wyımdastırılıp, qonaqtar üşin 180 kiiz üy tigilip, wlttıq tağamdar men öner körmeleri wsınıluda, dep habarlaydı Shalqar.kz.

Auılğa kelgen qonaqtar toydıñ joğarı deñgeyde ötkenin aytadı. Kiiz üylerdiñ säni, qonaqtardı kütip alu räsimderi men merekelik bağdarlamalar erekşe äser qaldırğan. Merekege Ğılım jäne joğarı bilim ministri Sayasat Nwrbek te arnayı qatısıp, Abaydıñ ğılımdağı ornı men «Tolıq adam» ilimi turalı söz söyledi.

Ayta keterligi, mereytoy ayasında «Abay-Şäkärim» kesenesi janında «Etno auıl Jidebay» keşeni boy köteredi. 60 gektarlıq aumaqtı qamtitın joba mecenat Bektas Medğatovtıñ bastamasımen jüzege asıp, öñirdegi turizmdi damıtuğa jäne Jidebaydı halıqaralıq deñgeydegi mädeni-tarihi ortalıqqa aynaldıruğa bağıttalğan.