Қазақстан Ұлттық банкі еліміздің басты заңының 30 жылдығына арнап ерекше нумизматикалық туынды дайындады. 2025 жылғы 27 тамыздан бастап ҚҰБ-тың ресми интернет-дүкенінде «Есте қалатын оқиғалар мен біртуар адамдар» сериясынан «Қазақстан Конституциясына 30 жыл» атты коллекциялық монеталар сатылымға шығады, деп хабарлайды Shalqar.kz.

Бұл мерекелік монета алтын жалатылған 925 сынамды күмістен соғылған. Салмағы – 31,1 грамм, диаметрі – 38,61 мм. Дайындалу сапасы proof деңгейінде жасалып, номиналы 1 000 теңгеге тең. Таралымы шектеулі – бар-жоғы 1 000 дана. Монеталар Қазақстан теңге сарайында шығарылды.

Айта кетейік, бұған дейін, 2025 жылдың 29 шілдесінен бастап Ұлттық банк «Ұлы қолбасшылар» сериясынан «ALEXANDER THE GREAT» коллекциялық монеталарын да сатылымға шығарған еді.