2025 жылдың қаңтар–шілде айлары аралығында Қазақстанның ұлттық парктерін шамамен 2 миллион адам аралады. Бұл еліміздегі табиғи демалыс пен экотуризмге деген сұраныстың жоғары екенін айқындайды, деп хабарлайды Shalqar.kz.

Туристерді ең көп қабылдаған парк – «Бурабай» мемлекеттік ұлттық табиғи паркі. Ақмола облысындағы бұл көрікті мекенге 7 ай ішінде 600 мыңнан астам саяхатшы барған. Қарағайлы орман, әсем жартастар мен мөлдір көлдердің үйлесімі Бурабайды «қазақстандық Швейцария» атандырған. Ол отбасылық демалыс пен белсенді туризм үшін ең танымал бағыттардың бірі болып қала береді.

Екінші орында Алматы қаласының іргесіндегі Іле-Алатау ұлттық паркі тұр. Мұнда аталған кезеңде 507 541 турист келіп, таулы табиғат пен алуан түрлі флораны тамашалады. Парк экологиялық туризмнің сұранысқа ие бағыттарының бірі саналады.

Үштікті Алматы облысындағы «Көлсай көлдері» ұлттық паркі түйіндейді – мұнда 350 мыңнан астам адам келген. Көлсай мен Қайыңды көлдері парктың ең басты табиғи нышандары саналады.

Сонымен қатар алғашқы бестікке Алматы облысындағы Шарын ұлттық паркі мен Павлодар облысындағы Баянауыл ұлттық паркі енді. Шарын өзіне тән шатқалымен фототуризм мен джип-турларды ұнататын саяхатшыларды қызықтырса, Баянауыл жұмсақ климаты, таулы ландшафттары және әсем көлдерімен ерекшеленеді.