2025 جىلدىڭ قاڭتار–شىلدە ايلارى ارالىعىندا قازاقستاننىڭ ۇلتتىق پاركتەرىن شامامەن 2 ميلليون ادام ارالادى. بۇل ەلىمىزدەگى تابيعي دەمالىس پەن ەكوتۋريزمگە دەگەن سۇرانىستىڭ جوعارى ەكەنىن ايقىندايدى, دەپ حابارلايدى Shalqar.kz.

تۋريستەردى ەڭ كوپ قابىلداعان پارك – «بۋراباي» مەملەكەتتىك ۇلتتىق تابيعي پاركى. اقمولا وبلىسىنداعى بۇل كورىكتى مەكەنگە 7 اي ىشىندە 600 مىڭنان استام ساياحاتشى بارعان. قاراعايلى ورمان, اسەم جارتاستار مەن مولدىر كولدەردىڭ ۇيلەسىمى بۋرابايدى «قازاقستاندىق شۆەيتسارييا» اتاندىرعان. ول وتباسىلىق دەمالىس پەن بەلسەندى تۋريزم ۇشىن ەڭ تانىمال باعىتتاردىڭ بىرى بولىپ قالا بەرەدى.

ەكىنشى ورىندا الماتى قالاسىنىڭ ىرگەسىندەگى ىلە-الاتاۋ ۇلتتىق پاركى تۇر. مۇندا اتالعان كەزەڭدە 507 541 تۋريست كەلىپ, تاۋلى تابيعات پەن الۋان تۇرلى فلورانى تاماشالادى. پارك ەكولوگييالىق تۋريزمنىڭ سۇرانىسقا يە باعىتتارىنىڭ بىرى سانالادى.

ۇشتىكتى الماتى وبلىسىنداعى «كولساي كولدەرى» ۇلتتىق پاركى تۇيىندەيدى – مۇندا 350 مىڭنان استام ادام كەلگەن. كولساي مەن قايىڭدى كولدەرى پاركتىڭ ەڭ باستى تابيعي نىشاندارى سانالادى.

سونىمەن قاتار العاشقى بەستىككە الماتى وبلىسىنداعى شارىن ۇلتتىق پاركى مەن پاۆلودار وبلىسىنداعى باياناۋىل ۇلتتىق پاركى ەندى. شارىن وزىنە تان شاتقالىمەن فوتوتۋريزم مەن دجيپ-تۋرلاردى ۇناتاتىن ساياحاتشىلاردى قىزىقتىرسا, باياناۋىل جۇمساق كليماتى, تاۋلى لاندشافتتارى جانە اسەم كولدەرىمەن ەرەكشەلەنەدى.