Mäskeudiñ Tret'yakov galereyasında Äbilhan Qasteev atındağı QR Memlekettik öner muzeyi äzirlegen «Qazaqstan öneriniñ jauharları» attı körme aşıldı. İs-şara Resey Federaciyasında Qazaqstan Respublikasınıñ mädeni künderi ayasında ötip jatır. Saltanattı räsimge QR Mädeniet jäne aqparat ministri Aida Balaeva bastağan qazaqstandıq delegaciya qatıstı, dep habarlaydı Shalqar.kz.

«Reseydegi Qazaqstannıñ mädeni künderi – eki el arasındağı ıntımaqtastıqtıñ mañızdı kezeñi, üzdiksiz diplomatiyalıq dialogtıñ jemisi. Bwl auqımdı joba Mäskeudiñ jetekşi mädeniet alañdarın qamtıp, Qazaqstannıñ zamanaui mädeni jetistikteriniñ keñ palitrasın – teatr men muzıkadan bastap, kino jäne beyneleu önerine deyin wsınadı. Keyingi 34 jılda Mäskeude qazaq suretşileriniñ körmesi alğaş ret ötip otır. Ä. Qasteev atındağı Memlekettik öner muzeyiniñ kartinaları «Krımskiy val» galereyasında eñ soñğı ret 1991 jıldıñ tamızında qoyılğan edi. Sondıqtan bügingi ekspoziciyanı biz Qazaqstan men Resey arasındağı mädeni baylanıstardı nığaytudağı jarqın oqiğa äri jaña beles dep bağalaymız», – dedi Aida Balaeva.

10-13 qazan aralığında qazaqstandıq jäne şeteldik körermeniniñ köñilinen şıqqan «Vremya patriotov», «Toqta, tün!», «Dos-Mwqasan», «1941 jıldıñ jazı», «90+1» fil'mderi men «Altın adam» mul'tfil'min köre aladı.
Barlıq fil'm qazaq jäne orıs tilderinde körsetiledi.

Reseylik körermen üşin 13 qazan küni Kişi teatr sahnasında «Parasat maydanı» spektakli qoyıladı. Qoyılım – zamanaui adamnıñ ruhani izdenisteri men işki älemin suretteytin psihologiyalıq drama. Qazaq ädebietiniñ klassigi Tölen Äbdik şığarmaları negizinde sahnalanğan. Spektakl'di Q.Quanışbaev atındağı Qazaq memlekettik akademiyalıq muzıkalıq-drama teatrınıñ akterleri sahnalaydı.

Reseydegi Qazaqstannıñ mädeni künderi qaraşa ayında qazaqstandıq önerpazdardıñ gala-koncertimen qorıtındılanadı.