ەلىمىزدە مولشەرلەمەسى 7-9 پايىز بولاتىن يپوتەكا ۇشىن قوسىمشا 500 ملرد تەڭگە بولىندى. وتىنىمدەردى قابىلداۋدىڭ جاڭا كەزەڭى بيىل قاراشادا باستالادى. تۇرعىن ۇي باعدارلامالارى تۋرالى تولىعىراق Shalqar.kz-تەن وقىڭىز.

داعدارىسقا قارسى شارالار اياسىندا قازاقستاندا سۋبسيدييالانعان تۇرعىن ۇي باعدارلامالارىن قولداۋدى جالعاستىرۋ تۋرالى شەشىم قابىلداندى. بۇل ماقساتتا "ناۋرىز" جانە "ناۋرىز جۇمىسكەر" يپوتەكالىق باعدارلامالارىنا قوسىمشا 500 ملرد تەڭگە بولىندى.

"كرىشا" پورتالىنىڭ حابارلاۋىنشا, باعدارلامالار بويىنشا وتىنىم قابىلداۋدىڭ جاڭا كەزەڭى 2025 جىلدىڭ قاراشاسىنا جوسپارلانعان, بىراق وعان قاتىسۋ شارتتارى كەيىنىرەك حابارلانادى.

"قازىر ونىڭ مەحانيزمدەرى ويلاستىرىلىپ جاتىر: جاڭا كونكۋرسقا وتىنىمدەر قابىلداي باستايمىز نەمەسە ناۋرىز ايىندا قاتىسقان, بىراق شارتتارعا ساي كەلمەگەندەرگە نەسيە بەرەمىز", - دەدى "وتباسى بانكى" اق باسقارما تورايىمى لاززات يبراگيموۆا.

ايتا كەتۋ كەرەك, باعدارلاماعا قاتىساتىن قۇرىلىس سالۋشىلار الداعى ۇش جىلدا سالىنىپ جاتقان پاتەرلەرىنىڭ باعاسىن وسى دەڭگەيدە ۇستاپ تۇرۋ تۋرالى كەلىسىمدەرگە قول قويادى.

ەستەرىڭىزگە سالا كەتەيىك, "ناۋرىز" جانە "ناۋرىز جۇمىسكەر" باعدارلامالارىنىڭ شارتتارى تومەندەگىدەي:

7 پايىزدىق مولشەرلەمە – حالىقتىڭ الەۋمەتتىك وسال توبى ساناتىنداعى ازاماتتار ۇشىن, باسقا قازاقستاندىقتار ۇشىن مولشەرلەمە – 9 پايىز;

باستاپقى جارنا: ارلەنگەن پاتەرلەر ۇشىن 10 پايىز, جوندەۋسىز ساتىپ الىناتىن پاتەرلەر ۇشىن 20 پايىز ;

نەسيە سوماسى: الماتى مەن استانا قالالارىنا 36 ملن تەڭگەگە دەيىن, باسقا وڭىرلەرگە 30 ملن تەڭگەگە دەيىن;

الماتى مەن استانادا تەك جاڭا تۇرعىن ۇي ساتىپ الۋعا بولادى, ال باسقا ايماقتاردا – كەز كەلگەن تۇرعىن ۇي, سونىڭ ىشىندە قايتالاما نارىقتاعى جەكە ۇيلەردى الۋعا بولادى;

قارىز الۋشىنىڭ سوڭعى 5 جىلدا جەكە باسپاناسى بولماۋى كەرەك;

قاتىسۋشىنىڭ "وتباسى بانكىندە" كەمىندە 2 ملن تەڭگە دەپوزيتى بولۋى كەرەك.

بۇل رەتتە "ناۋرىز جۇمىسكەر" يپوتەكاسىنا ونەركاسىپ, ەنەرگەتيكا, كولىك, اۋىل شارۋاشىلىعى, سۋ رەسۋرستارى سالالارىنىڭ ماماندارى قاتىسا الادى.

ەستەرىڭىزگە سالا كەتەيىك, قازاقستاندا اسكەري قىزمەتكەرلەرگە ارنالعان "اسكەري باسپانا" يپوتەكالىق باعدارلاماسى قايتا اشىلادى. تولىق اقپارات 20 قازاندا جارييالانادى.