Қазақстанда TikTok-тың жұмысын шектеу мәселесі күн тәртібіне шықты. Мәжілістің бүгінгі жалпы отырысында “AMANAT” партиясының депутаттары балалар мен жастардың санасына теріс әсер ететін контенттің көптігін алға тартып, TikTok-қа шектеу қоюды ұсынды, деп хабарлайды Shalqar.kz.

Статистикаға сүйенсек, елімізде 14,1 миллион адам TikTok қолданушысы ретінде тіркелген. Олардың басым бөлігі – балалар мен жасөспірімдер. Депутаттар Жанарбек Әшімжан, Елнұр Бейсенбаев, Аманжол Әлтай және Қазыбек Әлішевтің айтуынша, бірқатар мемлекеттер TikTok-ты ішінара немесе толықтай шектеп үлгерген:
 • Ресей, Қырғызстан, Өзбекстан, Тәжікстан – TikTok-ты қолдануға белгілі бір деңгейде тыйым салды.
 • Франция – жасөспірімдердің интернетті пайдалануын заңнамалық тұрғыда реттеді.
 • Аустралия – 16 жасқа дейінгі балаларға TikTok қолдануға заңмен шектеу қойды.
 • Еуропалық Одақ, Канада, Ұлыбритания, Жаңа Зеландия – балалар қауіпсіздігі үшін 2023 жылы TikTok-қа қатысты шектеу енгізді.
 • Қытай – TikTok-тың негізін қалаған ел болса да, өз аумағында оның толық нұсқасына қолжетімділікті жауып тастаған.

Мәжілісмендер TikTok-тың психологиялық, әлеуметтік және академиялық тұрғыдан балаларға кері әсерін атап өтті. Жанарбек Әшімжан Үкімет басшысына жолдаған депутаттық сауалында:

“TikTok-ты шамадан тыс қолдану баланың санасы мен денсаулығына теріс ықпал етеді. Бұл платформада ұлттық құндылықтарымызды жоққа шығаратын, жастарды теріс бағытқа жетелейтін контент көп. Сондықтан біз де бұл мәселеге назар аударып, TikTok-қа шектеу қоюды тездетуіміз керек”, – деді.

Депутаттар TikTok-тағы қазақи дәстүрге сай келмейтін, әдепсіз контентті бақылауды күшейтуді, сондай-ақ кәмелетке толмаған балалардың бұл платформаны қолдануына шектеу қою немесе толық тыйым салу тетіктерін қарастыруды ұсынды.

Қазақстан TikTok-ты шектеуге шешім қабылдай ма, жоқ па – бұл алдағы уақыттың еншісінде.