Almatıda metro jelisin qala sırtına — Alatau qalasına qaray wzartu mümkindigi qarastırılıp jatır, dep habarlaydı Shalqar.kz.

Almatıda qalanıñ 2040 jılğa deyingi Bas josparına özgeris engizu boyınşa qoğamdıq talqılaular ötip jatır. Onda «Almatıbasjospar» ĞZI bas direktorı Ashat Säduov megapolistiñ kölik infraqwrılımın damıtu josparı turalı aytıp berdi.

Onıñ aytuınşa, qoldanıstağı metro jelisi qızıl tüspen belgilengen. Ol «Qalqaman» beketi aşılğan soñ, aldağı uaqıtta «Barlıq» bazarına deyin wzartıladı. Sonday-aq, «qızıl» jeli ekinşi bağıtta Almatı-1 temirjol vokzalına deyin jetui mümkin.

— Qazir biz «qızıl» jelini «Barlıq» stanciyasına deyin jetkizudi jäne onı Almatı-1 temirjol vokzalına deyin wzartudı talqılap jatırmız, — dedi ol.

Jobada körsetilgen derekterge säykes, «Rayımbek batır» beketinen Almatı-1 temirjol vokzalına deyin metronıñ wzındığı 7,7 km bolmaq jäne 5 jaña stanciya salınadı.

Jañadan salınatın metronıñ ekinşisi kök tüspen belgilengen. Onı aldımen, «Jibek jolı» beketinen äuejayğa deyin jetkizu josparlanıp otır. Ashat Säduovtıñ sözinşe, äuejay äkimşiligi metro beketin tikeley terminal aldındağı twraqqa ornalastırudı wsınğan. Keyin «kök» metro jelisi saqina tärizdes bolıp, qalanı aynala salınadı.

— Ekinşi kezeñ — «Şığıs qaqpasındağı» kölik habımen baylanıstıratın metronıñ «kök» tarmağı. Bwl habta Qwlja jäne Talğar traktilerinen, Bwqtırma, Ülken Almatı aynalma jolınan, Alatau trassasınan keletin adamdar kelip, osı jerden auısıp otıradı. Ol poliortalıqtıñ negizgi özegine aynaladı, — dep tüsindirdi Ashat Säduov.

Joba boyınşa «Jibek jolı» beketi men äuejay arasındağı metro jelisiniñ wzındığı 14 km boladı jäne onıñ boyında 8 beket ornalasadı. Al jalpı «kök» metro jelisiniñ boyında 42 beket salınbaq, wzındığı — 76,6 km.

Ashat Säduov metronıñ üşinşi «jasıl» jelisi Alatau qalasınan keletin adamdardı qabıldap, soltüstik kölik torabımen baylanısatının atap ötti.

— «Jasıl» jelini Soltüstik aynalma jolı («Baraholka») boyımen «Sayran» stanciyasına şığaramız, — dedi «Almatıbasjospar» basşısı.

Bas josparğa engizilgen tüzetulerde «Baraholka» bazarın Alatau qalasına köşiru qarastırılmağan. Onıñ ornına qoldanıstağı sauda ortalıqtarın jañğırtuğa basımdıq beriledi.

Jobağa säykes, «jasıl» jeliniñ boyında 17 beket ornalasadı jäne wzındığı 28 km-ge jetedi. Odan bölek bir metro jelisinen ekinşisine auısıp otıratın 5 stanciya boladı.