82 жастағы оралдық ардагер журналист Тихон Әліпқалиев – еліміздегі ең бай жеке кітапханалардың бірінің иесі. Оның үйінде 16 мыңға жуық кітап сақталған. Әдеби шығармалардан бастап ғылыми-танымдық еңбектерге дейінгі бұл байлық үш бөлменің алты қабырғасын толықтай алып жатыр, деп хабарлайды Shalqar.kz.

Тихон Әліпқалиевтің кітап жинауға деген құштарлығы студенттік жылдарында басталған. Ол демалысқа шыққан сайын кітаптарын қайда қалдыратынын ойлап, әрдайым арнайы орын іздейтін. Қазіргі таңда оның қорында Сәбит Мұқановтың 1935 жылы жарық көрген «Теміртас» романы мен Қажым Жұмалиевтің 1948 жылы шыққан «Қазақ әдебиеті» атты екі томдық еңбегі секілді құнды антикварлық басылымдар бар.

Тихон Әліпқалиев қазақ әдебиеті алыптарының ішінде Ғабит Мүсіреповтің шығармаларын ерекше бағалайды, ал шетел әдебиетінің классиктері арасында Тургеневті жоғары қояды.

Қарияның жары Сара Танабаева күйеуінің кітапқа деген махаббатын әрқашан қолдағанын айтады. “Пенсиясының көп бөлігі кітап алуға жұмсалады, бірақ мен оған ренжімеймін”, – дейді ол. Қазіргі таңда кітаптардың бір бөлігі балконда, ал біразы басқа үйге қойылған.

Тихон Әліпқалиев үшін кітап жай ғана қағаз емес, нағыз рухани қазына. Оның үйіндегі мыңдаған кітап – бір адамның ғана емес, бүтін бір ұрпақтың білімі мен мәдениетіне қосылған үлес.