2025 جىل قازاقستاننىڭ اسكەري قىزمەتشىلەرىن الەۋمەتتىك قامتاماسىز ەتۋ جۇيەسى ۇشىن ەڭ مازمۇندى وزگەرىستەرگە تولى كەزەڭدەردىڭ بىرى بولدى. قابىلدانعان شارالار اقشالاي ۇلەسپەن قامتۋدى, تۇرعىن ۇي ماسەلەلەرىن, بىلىم بەرۋ, وتباسىلاردى قولداۋ جانە قىزمەت اياقتالعاننان كەيىن ازاماتتىق ومىرگە بەيىمدەۋدى قامتىدى. بۇل تۋرالى قورعانىس مينيسترلىگى جازدى, دەپ حابارلايدى Shalqar.kz.

نەگىزگى قادامداردىڭ بىرى لاۋازىمدىق جالاقىلاردىڭ وسۋى بولدى. 2025 جىلعى 1 قاڭتاردان باستاپ وفيتسەرلىك قۇرامنىڭ جالاقىسى ورتا ەسەپپەن 20,3 پايىزعا, ال قاتارداعى جانە سەرجانتتىق قۇرامدىكى 33,9 پايىزعا ارتتى. سونىمەن قاتار بۇرىن جويىلعان دالالىق تولەمدەر جۇيەسى قايتا ەنگىزىلدى. 1 شىلدەدەن باستاپ اسكەري قىزمەتشىلەرگە دالالىق شىعۋلارعا, تەڭىز جورىقتارىنا جانە وقۋ-جاتتىعۋلارعا قاتىسقان اربىر تاۋلىك ۇشىن ىسساپار راسىمدەمەي-اق, 1,2 ايلىق ەسەپتىك كورسەتكىش مولشەرىندە دالالىق تولەمدەر تولەنە باستادى. 

الداعى ۋاقىتتا دا قوسىمشا وزگەرىستەر جوسپارلانعان. 2026 جىلعى 1 قاڭتاردان باستاپ ەڭبەكاقى تولەۋدىڭ جاڭا جۇيەسى اياسىندا جالاقىنى ارتتىرۋدىڭ ەكىنشى كەزەڭى ىسكە اسادى. ياعني, وفيتسەرلەر ۇشىن تاعى 23 پايىزعا, ال قاتارداعى جانە سەرجانتتىق قۇرام ۇشىن بىرىنشى كەزەڭ دەڭگەيىنەن 10 پايىزعا وسىرۋ كوزدەلگەن. 

تۇرعىن ۇيمەن قامتاماسىز ەتۋ سالاسى دا ەلەۋلى تۇردە دامىدى. 2025 جىلدىڭ 17 قاراشاسىنان باستاپ «وتباسى بانك» تۇرعىن ۇي تولەمدەرىن الاتىن اسكەري قىزمەتشىلەرگە ارنالعان ارنايى يپوتەكالىق ونىمدەردى ىسكە قوستى. باستاپقى جارناسى 20 پايىزدىق «اسكەري باسپانا» باعدارلاماسى قايتالاما تۇرعىن ۇي نارىعىنان باسپانا ساتىپ الۋعا باعىتتالعان. الدىن الا قارىز بويىنشا پايىزدىق مولشەرلەمە جىلىنا 18 پايىز جانە تۇرعىن ۇي قۇنىنىڭ 50 پايىزى جيناقتالعان كەزدە 5 پايىزعا تومەندەيدى. «ناۋرىز اسكەري» باعدارلاماسى باستاپقى جارناسىز جاڭا قۇرىلىستان پاتەر ساتىپ الۋعا مۇمكىندىك بەرەدى. استانا مەن الماتى قالالارىندا قارىزدىڭ ەڭ جوعارى سوماسى 36 ملن تەڭگەگە دەيىن, باسقا وڭىرلەردە 30 ملن تەڭگەگە دەيىن, ال باستاپقى جارنا 20 پايىزدان اسقان جاعدايدا 80 ملن تەڭگەگە دەيىن جەتەدى. قارىز بويىنشا پايىزدىق مولشەرلەمە جىلىنا 9 پايىزدى قۇرايدى. 

2025 جىلى اسكەري قىزمەتشىلەردىڭ وتباسىلارىن قولداۋعا دا ەرەكشە كوڭىل بولىندى. اسكەري قىزمەتشىلەردىڭ مىڭنان استام بالاسى «بالداۋرەن» بالالار ساۋىقتىرۋ ورتالىعىندا دەمالىپ, دەنساۋلىقتارىن نىعايتتى. بۇل قورعانىس مينيسترلىگىنىڭ الەۋمەتتىك ساياساتىنىڭ ماڭىزدى بولىگىنە اينالدى. 

سونىمەن قاتار مەرزىمدى اسكەري قىزمەتتىڭ بەدەلىن ارتتىرۋ جانە الەۋمەتتىك كەپىلدىكتەردى كەڭەيتۋ جۇمىستارى جالعاسىپ جاتىر. Sarbaz 2.0 تسيفرلىق جوباسى ىسكە قوسىلعالى بەرى 9 مىڭنان استام ۇزدىك اسكەري قىزمەتشى بىلىم بەرۋ گرانتتارىنا يە بولدى. ونىڭ ىشىندە 3 000-نان استامى جاتاقحاناعا باسىمدىقپەن ورنالاستىرۋ جانە شاكىرتاقى تولەۋ قاراستىرىلعان مەملەكەتتىك گرانتتار ەكەنىن اتاپ وتۋ كەرەك. ەل تاريحىندا العاش رەت ىرىكتەۋ تولىق اۆتوماتتاندىرىلعان فورماتتا وتۋدە. بۇل جۇيە ساربازداردىڭ رەيتينگىن تارتىپ, دەنە دايىندىعى جانە جاۋىنگەرلىك دايىندىق كورسەتكىشتەرى بويىنشا قالىپتاستىرادى. ال الگوريتم گرانتتاردى تاڭدالعان جوعارى وقۋ ورىندارى مەن ماماندىقتار اراسىندا وزدىگىنەن بولەدى. 

ساربازدار مەن ولاردىڭ وتباسىلارىنا تۇسەتىن قارجىلىق جۇكتەمە دە ازايتىلدى. 20 مىڭنان استام مەرزىمدى اسكەري قىزمەتشى جالپى سوماسى شامامەن 8 ملرد تەڭگەنى قۇرايتىن «نەسيەلىك دەمالىستى» پايدالاندى. سونىمەن قاتار قىزمەت بارىسىندا ساربازدار ەڭبەك نارىعىندا سۇرانىسقا يە اۋىر جۇك كولىگىنىڭ جۇرگىزۋشىسى, ەكسكاۆاتورشى, بايلانىس مامانى, ديزەليست-ەلەكتريك, پارامەديك جانە باسقا دا كاسىپتەر بويىنشا جۇمىسشى ماماندىقتارىن تەگىن مەڭگەرە الادى. وقۋ اياقتالعان سوڭ ولارعا سەرتيفيكاتتار بەرىلەدى. 

الەۋمەتتىك ساياساتتىڭ جاڭا باعىتى – اسكەري قىزمەتشىلەردى قىزمەتتەن كەيىنگى ومىرگە دايارلاۋ. قورعانىس مينيسترلىگى زەينەتكە شىعار الدىندا اسكەري قىزمەتشىلەردى بەيىمدەۋ باعدارلاماسىن ىسكە قوستى. ەندى ولار اسكەري جوعارى وقۋ ورىندارىنىڭ بازاسىندا مەكتەپتەردە العاشقى اسكەري دايىندىق پانىنەن ساباق بەرۋ ۇشىن, سونداي-اق اسكەري كافەدرالاردا جۇمىسقا ورنالاسۋ ماقساتىندا تەگىن قايتا دايارلاۋدان وتە الادى. بۇل شەشىم وفيتسەرلەردىڭ كاسىبي الەۋەتىن ساقتاۋعا جانە ازاماتتىق قىزمەتكە بىرتىندەپ كوشۋىنە مۇمكىندىك بەرەدى.