قازاقستاننىڭ كورنەكتى مەملەكەت جانە قوعام قايراتكەرى, ۇش مارتە سوتسياليستىك ەڭبەك ەرى, ديپلومات, اكادەميك دىنمۇحامەد احمەتۇلى قوناەۆتىڭ تۋعانىنا 114 جىل تولۋىنا وراي الماتى قالاسىندا تاريحي تۇلعانىڭ ەسكەرتكىشىنە گۇل شوقتارىن قويۋ راسىمى وتتى, دەپ حابارلايدى Shalqar.kz.

تاعزىم ەتۋ شاراسىنا دىنمۇحامەد احمەتۇلىنىڭ قىزمەتتەستەرى مەن تۋعان-تۋىستارى, مەملەكەت جانە قوعام قايراتكەرلەرى, جوعارى وقۋ ورىندارىنىڭ ستۋدەنتتەرى, سونداي-اق قالا تۇرعىندارى مەن قوناقتارى قاتىستى.

ىس-شارا اياسىندا «عىلىم ورداسى» اتىنان دىنمۇحامەد قوناەۆقا قاتىستى بارلىق رەسمي قۇجاتتار د. ا.قوناەۆ مۋزەيىنىڭ قورىنا تابىستالدى. بۇل قۇندى مۇرا ۇلى تۇلعانىڭ ساياسي, عىلىمي جانە قوعامدىق قىزمەتىن تەرەڭىرەك زەردەلەۋگە مۇمكىندىك بەرەدى.

ودان بولەك تاريحي تۇلعانىڭ اتى بەرىلگەن الماتى وبلىسىنىڭ اكىمشىلىك ورتالىعى — قوناەۆ قالاسىندا دىنمۇحامەد احمەتۇلى ەسكەرتكىشىنە گۇل شوقتارىن قويۋ راسىمى وتتى. ەسكە الۋ شاراسىنا وبلىسى اكىمدىگىنىڭ وكىلدەرى, مادەنيەت سالاسىنىڭ وكىلدەرى, قۇقىق قورعاۋ ورگاندارىنىڭ قىزمەتكەرلەرى جانە قالا تۇرعىندارى قاتىستى.

ەسكە سالايىق, 1912 جىلدىڭ 12 قاڭتارىندا اسا كورنەكتى مەملەكەت جانە قوعام قايراتكەرى, ۇش مارتە سوتسياليستىك ەڭبەك ەرى, قازاق كسر عىلىم اكادەميياسىنىڭ اكادەميگى, تەحنيكا عىلىمدارىنىڭ دوكتورى دىنمۇحامەد احمەتۇلى قوناەۆ دۇنيەگە كەلگەن.