Astanada qazaq ädebietiniñ wlı klassigi, aqın jäne ağartuşı Abay Qwnanbaywlınıñ 180 jıldığına arnalğan erekşe muzıkalıq keş ötti. «Astana Opera» teatrında ötken «Wyıqtap jatqan jürekti än oyatar» attı koncertke klassikalıq muzıka men poeziyanı süyetinder jinaldı, dep habarlaydı Shalqar.kz tilşisi Sırtqı İster ministrligine silteme jasap.

Bwl keştiñ bastı erekşeligi – äygili kompozitor Erkeğali Rahmadievtiñ Abay öleñderine jazılğan romans toptamasınıñ alğaş ret orındaluı boldı. Körermenderge «Qalıñ elim, qazağım, qayran jwrtım», «Jazdıgün şilde bolğanda», «Köñilim qayttı dostan da, dwşpannan da…», «Qajımas dos halıqta joq», «Siz – qırğauıl jez qanat», «Qara qatın» jäne «Köñil qwsı qwyqıljır şartarapqa…» sındı tuındılar wsınıldı.

Sonday-aq, koncert bağdarlamasına «Men sälem jazamın», «Ğaşıqtıñ tili – tilsiz til», «Keyde eser köñil qwrğırıñ», «Ğaşıqtıq, qwmarlıqpen – ol eki jol» attı romanstar jäne Ahmet Jwbanov pen Latif Hamididiñ «Abay» operasınan ariyalar engizildi. Sonımen qatar, Sıdıq Mwhamedjanov, Manswr Sağatov jäne Evgeniy Brusilovskiy sındı kompozitorlardıñ aqın sözine jazılğan änderi şırqaldı.

Bwl koncert Abaydıñ 180 jıldığına arnalğan is-şaralardıñ bastaması boldı. Küzde körermender aqınnıñ sözine jazılğan basqa da kompozitorlardıñ şığarmalarınan qwralğan koncertti tamaşalay aladı.

Ayta keteyik, «Astana Opera» teatrında Abay mwrasın arqau etken spektakl'der twraqtı türde qoyıladı. Teatr repertuarındağı aytulı tuındılardıñ biri – Mwhtar Äuezovtiñ librettosına negizdelgen Ahmet Jwbanov pen Latif Hamididiñ «Abay» operası. Bwl qoyılım 2015 jılı teatrdıñ Ülken zalında alğaş ret sahnalanıp, 2018 jılı Qazaqstan Respublikasınıñ Memlekettik sıylığına ie bolğan edi.