الماتىدا پەداگوگيكالىق جانە عىلىمي قاۋىمداستىق وكىلدەرى باس قوسقان رەسپۋبليكالىق عىلىمي-پراكتيكالىق كونفەرەنتسييا وتتى. باستى تاقىرىپ – ەلىمىزدە پەداگوگيكا عىلىمىن دامىتۋ ورتالىعىن قۇرۋ. بۇل ورتالىق بىلىم بەرۋ جۇيەسىنىڭ بارلىق دەڭگەيىندە عىلىمي زەرتتەۋلەر جۇرگىزىپ, مۇعالىمدەردىڭ كاسىبي دامۋىن قولداۋعا باعىتتالماق, دەپ حابارلايدى Shalqar.kz.

وقۋ-اعارتۋ مينيسترى عاني بەيسەمباەۆتىڭ ايتۋىنشا, سوڭعى جىلدارى پەداگوگتەردىڭ بىلىكتىلىگىن ارتتىرۋعا ەرەكشە كوڭىل بولىنۋدە. وتكەن جىلى عىلىمي زەرتتەۋمەن اينالىساتىن مۇعالىمدەر سانى 1,6 ەسە وستى, ال ماگيستر دارەجەسى بار ۇستازدار قاتارى 27,9 مىڭعا جەتتى. سونىمەن قاتار, «بىلىم بەرۋدەگى وزگەرىستەردىڭ 1000 كوشباسشىسى» جوباسى اياسىندا بولاشاق بىلىم كوشباسشىلارىن دايارلاۋ جالعاسۋدا.

— ۇستازدىڭ كاسىبي دەڭگەيى – بىلىم ساپاسىنىڭ نەگىزى. جاڭا عىلىمي ورتالىق پەداگوگيكالىق زەرتتەۋلەردى جۇيەلى جۇرگىزۋگە, مۇعالىمدەردىڭ عىلىمي الەۋەتىن ارتتىرۋعا جانە بولاشاق پەداگوگ مامانداردى ساپالى دايىنداۋعا مۇمكىندىك بەرەدى, — دەدى عاني بەيسەمباەۆ.

كونفەرەنتسييا اياسىندا مەكتەپكە دەيىنگى, ورتا, تەحنيكالىق, كاسىپتىك جانە جوعارى بىلىم سالاسىنداعى وزەكتى ماسەلەلەر تالقىلاندى. وڭىرلەردەگى پەداگوگتەر مەن عالىمدار ۇشىن ونلاين-ترانسلياتسييا ۇيىمداستىرىلدى.

سونداي-اق, ال-فارابي اتىنداعى قازۇۋ مەن ى.التىنسارين اتىنداعى ۇلتتىق بىلىم اكادەميياسى اراسىندا ىنتىماقتاستىق تۋرالى مەموراندۋمعا قول قويىلدى. كەلىسىم نەگىزىندە ەلىمىزدە پەداگوگيكالىق عىلىمدى دامىتۋعا ارنالعان زەرتتەۋ الاڭى قۇرىلماق.