Қазақстандық киноиндустрия тағы бір ірі жетістікке қол жеткізді. Ханты-Мансийскіде өткен XXIII Халықаралық дебюттік кинофильмдер фестивалінде отандық «Шатырдағы екеу» фильмі «Душа России. Мировое кино» номинациясында жеңімпаз атанды, деп хабарлайды Shalqar.kz тілшісі Сыртқы Істер министрлігіне сілтеме жасап.

«Дух огня» – жас режиссерлерге арналған Ресейдің ең беделді фестивальдерінің бірі. Биылғы байқауға 14 елден фильмдер қатысып, көрермен назарына Малайзия, Қытай, Оңтүстік Корея, Жапония, Таиланд, Иран, Үндістан, Сингапур және басқа да елдердің жаңа туындылары ұсынылды.

Қазақстандық режиссер Гүлшат Смағұлованың дебюттік фильмі – «Шатырдағы екеу» өмірдің мәнін іздеу, махаббат пен мейірім секілді маңызды тақырыптарды қозғайды. Туындыда тағдырды өзгертуге себепші болатын кездейсоқ кездесулердің рөлі ерекше суреттелген.

Картинаның жоғары бағалануы оның мәдени және тарихи құндылықтарды терең ашып көрсетуімен байланысты. Осы еңбегі үшін фильм «Росконгресс» қорының арнайы жүлдесіне ие болды.