ابىلحان قاستەەۆ اتىنداعى مەملەكەتتىك ونەر مۋزەيىندە كورنەكتى سۋرەتشى ورال تاڭسىقباەۆتىڭ 120 جىلدىعىنا ارنالعان ەرەكشە كورمە اشىلدى. بۇل شارا بەينەلەۋ ونەرىنىڭ ۇزدىك وكىلىنە دەگەن قۇرمەت رەتىندە ۇيىمداستىرىلدى. كورمە وزبەكستان رەسپۋبليكاسىنىڭ مادەنيەت جانە ونەردى دامىتۋ قورى مەن قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن وتتى, دەپ حابارلايدى Shalqar.kz.

ەكسپوزيتسييادا سۋرەتشىنىڭ ەرەكشە ستيلىن, شىعارماشىلىق مۇراسىن جانە ۇلتتىق كەسكىندەمەنىڭ دامۋىنا قوسقان زور ۇلەسىن كورسەتەتىن 74 تۋىندى ۇسىنىلدى. كورمەنىڭ اشىلۋ سالتاناتىنا قازاقستاننىڭ مادەنيەت جانە اقپارات مينيسترى ايدا بالاەۆا, وزبەكستان رەسپۋبليكاسى پرەزيدەنتىنىڭ كومەكشىسى سايدا ميرزييوەۆا, الماتى قالاسىنىڭ اكىمى ەربولات دوساەۆ جانە ەكى ەلدىڭ ونەر قايراتكەرلەرى قاتىستى.

ايدا بالاەۆا وزىنىڭ سوزىندە, ورال تاڭسىقباەۆتىڭ ونەرى ەكى ەلدىڭ اراسىنداعى مادەني بايلانىستى نىعايتۋعا ۇلكەن ۇلەس قوسقانىن اتاپ وتىپ, ونىڭ تۋىندىلارى وزبەكستاننىڭ تابيعاتىن شىنايى ارى جوعارى دەڭگەيدە بەينەلەگەنىن ايتتى. «ورال تاڭسىقباەۆ پەن ابىلحان قاستەەۆ – ەكى ۇلى سۋرەتشى. ولار وز ەلدەرىندە ۇلتتىق كەسكىندەمە مەكتەبىنىڭ قالىپتاسۋىنا ەلەۋلى ىقپال جاساپ, كەيىنگى بۋىنعا ۇلكەن اسەر قالدىردى», – دەدى مينيستر.

وز كەزەگىندە, سايدا ميرزييوەۆا كورمەنى ۇيىمداستىرۋشىلارعا العىس بىلدىرىپ, قازاقستان مەن وزبەكستاننىڭ مادەنيەت سالاسىنداعى ىنتىماقتاستىعىنىڭ ماڭىزدىلىعىن سوز ەتتى. كورمە بيىلعى جىلدىڭ ماۋسىم ايىنا دەيىن اشىق بولادى. سونىمەن قاتار, وزبەكستان ۇلتتىق بالەتىنىڭ گاسترولьدەرى مەن ورال تاڭسىقباەۆتىڭ كورمەسى استانادا دا وتەتىن بولادى.