تۇركىستاندا ۇلىستىڭ ۇلى كۇنىنە وراي جانە تۋريزم ماۋسىمىنىڭ اشىلۋىن مەرەكەلەۋ ماقساتىندا 2,5 توننا ناۋرىز كوجە دايىندالدى. مۇنداي اۋقىمدى شارا قالانىڭ مەرەكەلىك اتموسفەراسىن قىزدىرىپ, جۇزدەگەن تۇرعىن مەن قوناقتى داستۇرلى تاعامنان دام تاتۋعا شاقىردى, دەپ حابارلايدى Shalqar.kz.

12 قازان, 24 ساعات جانە 2,5 توننا كوجە

ۇلتتىق تاعامدى ازىرلەۋ وڭاي شارۋا ەمەس. اسپازداردىڭ ايتۋىنشا, وسىنشاما كولەمدەگى كوجەنى دايىنداۋعا بىر تاۋلىك ۋاقىت كەتكەن. سىيىمدىلىعى 250-300 ليتر بولاتىن 12 قازانعا بولىنىپ پىسىرىلگەن. دامى تىل ۇيىرەتىن ناۋرىز كوجە ۇشىن 250 كەلى ەت پەن 1 توننا داندى داقىل پايدالانىلدى.

داستۇرلى تۇردە ناۋرىز كوجە جەتى تۇرلى دامنەن جاسالاتىنى بەلگىلى. الايدا بۇل جولى اسپازدار ەرەكشە قادامعا بارىپ, تاعامعا سەگىزىنشى قوسپا — قۇرت مالتاسىن قوسقان. بۇل ناۋرىز كوجەنىڭ دامىن ەرەكشە ەتىپ, وعان ۇلتتىق ناقىش پەن ەرەكشە حوش يىس سىيلادى.

ىس-شارانى ۇيىمداستىرۋشىلاردىڭ بىرى ايگەرىم ناماتوۆا 2,5 توننا كوجە دايىنداۋدىڭ وڭايعا سوقپاعانىن ايتادى.

“ۇيىقتاماعان كەزدەر بولدى, ەڭبەگىمىز كوپ جۇمسالدى. بىراق بۇل جۇمىس بىز ۇشىن تەك اۋىر مىندەت ەمەس, كەرىسىنشە مەرەكەگە ۇلەس قوسۋ باقىتى بولدى. ار قازاندى سۇيىسپەنشىلىكپەن دايىندادىق”, – دەيدى ول.

ناۋرىز كوجەدەن دام تاتقان قالا تۇرعىندارى مەن قوناقتار ونىڭ ەرەكشە دامىن اتاپ وتتى.

“دامى وتە كەرەمەت. ىشىنە قازى مەن ەت قوسىپ, ناعىز قازاقى اس ازىرلەگەن. وسىنداي داستۇرلەرىمىز ۇرپاقتان-ۇرپاققا جالعاسا بەرسىن!” – دەيدى سايرام اۋدانىنىڭ تۇرعىنى بەكزات سامەتوۆ.