قازاقستاندىق كورەرمەندەرگە ۇلتتىق ونەر مەن مادەنيەت تاريحىنا ارنالعان جاڭا تاريحي-درامالىق تەلەحيكايا ۇسىنىلماق. «قازاقستان» تەلەراديوكورپوراتسيياسى قازاق تەاترىنىڭ 100 جىلدىعىنا وراي «شام تۇبىندەگى شىندىق» اتتى ۇش بولىمدى سەريالدى كورەرمەن نازارىنا ۇسىنادى, دەپ حابارلايدى Shalqar.kz.

تەلەحيكايادا 1925 جىلى قىزىلوردادا ىرگەسى قالانعان تۇڭعىش ۇلتتىق قازاق تەاترىنىڭ تاريحى باياندالادى. سونداي-اق, تەاتردىڭ الماتىعا قونىس اۋدارۋ كەزەڭىندەگى اتاقتى رەجيسسەر جۇمات شانيننىڭ ەڭبەگى ەرەكشە كورسەتىلەدى.

كورەرمەندەر 1927 جىلى ماسكەۋدە وتكەن ەتنوگرافييالىق كونتسەرتتە قازاق زييالىلارىنىڭ ونەر كورسەتۋ ساتتەرىن تاماشالاپ, قالىبەك قۋانىشباەۆ, امىرە قاشاۋباەۆ, كۇلاش بايسەيىتوۆا, سەركە قوجامقۇلوۆ سىندى تۇلعالاردىڭ رولىن سومداعان اكتەرلەردىڭ شەبەرلىگىنە تانتى بولا الادى.

تەلەحيكايانىڭ رەجيسسەرى – جاسۇلان پوشانوۆ. ال باستى رولدى عالىم وسپانوۆ (جاس كەزى) جانە ازامات ەسقۇلوۆ (ەسەيگەن كەزى) سومدايدى. سونداي-اق, كورەرمەندەر سەركە قوجامقۇلوۆ رولىندەگى جانداۋلەت باتايدى, امىرە قاشاۋباەۆ رولىندەگى بىرجان بازىلجانوۆتى, قالىبەك قۋانىشباەۆتى سومداعان الماس شاياحمەتوۆتى, ال كۇلاش بايسەيىتوۆا بەينەسىندەگى ينابات ريزابەكوۆانى تاماشالاي الادى.